йавропа иттипақи: йәр тәврәш түркийә билән йеңи сәһипә ечилиши үчүн муһим пурсәт
йавропа иттипақи комитетиниң инсанпәрвәрлик йардәмләр вә киризисни башқурушқа мәсул әзаси җаниз ленарчич 6-феврал қаһраманмарашни мәркәз қилған йәр тәврәш апитиниң түркийә билән болған мунасивәтләрдә йеңи сәһипә ечиш үчүн бурсәт икәнликини ейтти.
түркийә авази радийоси хәвири: ленарчич йавропа парламенти тәрәққийат комитети йиғинида қилған сөзидә, йавропа иттипақиниң түркийәдики йәр тәврәштин кейин барлиқ аппаратлирини сәпәрвәр қилғанлиқини билдүрүп мундақ деди: «барлиқ аппаратлиримизни буниңдин кейинму давамлиқ сәпәрвәр қилимиз. дәрвәқә, бу йардәмләр кәлгүсидиму йавропа иттипақидин һалқиған асаста техиму кәң даиридә давамлишиши керәк. җүмлидин, бу йардәмләр хәлқара җәмийәтни қайта шәкилләндүрүш вә ислаһат елип бериш йолида түрткилик рол ойниши керәк. мениңчә 6-феврал қаһраманмарашни мәркәз қилған йәр тәврәш апити түркийә билән болған мунасивәтләрдә йеңи сәһипә ечиш үчүн муһим пурсәттур.»
җаниз ленарчич түркийәдики йәр тәврәш апитидә еғир талапәткә учриған вилайәтләрдики әң җиддий еһтийаҗларни қандуруш үчүн һазирғичә 8 милйон йавродин артуқ инсанпәрвәрлик йардәм бәргәнликлирини тәкитләп мундақ деди: «йавропа иттипақи комитетиниң башқа аппаратлири билән бирликтә қошумчә мәбләғ топлаш йолида издиниватимиз.»
ленарчич йәр тәврәш йүз бәргәндин кейинки дәсләпки пәйтләрдә, йавропа иттипақиға әза 21 дөләт вә йавропа иттипақиниң башқа пуқраларни қоғдаш механизми иштиракчилириниң 30 издәш-қутқузуш әтрити вә алтә давалаш әтритини дәрһал апәт районлириға әвәткәнликини байан қилди.
у издәш-қутқузуш паалийәтлириниң 17-феврал күни ахирлашқанлиқини, әмма давалаш әтрәтлириниң һазирму апәт районлирида вәзипә өтәватқанлиқини ейтти.
ленарчич йәнә, йавропа иттипақиға әза 18 дөләтниң панаһлиниш материйаллири, давалаш үскүнилири, йемәклик вә кийим-кечәк қатарлиқ мәһсулатларни әвәткәнликини, бу хил мәһсулатларниң саниниң 2 милйон 600 миңдин ашқанлиқиниму сөзлиригә илавә қилди.
