мичотакис: йәр тәврәш икки дөләт мунасивәтлирини қайтидин ениқлаш пурсити
гиретсийә баш министири кирйакос мичотакис түркийәдә 6 – феврал күни йүз бәргән икки қетимлиқ йәр тәврәш апитиниң, түркийә – гиретсийә мунасивәтлирини қайтидин ениқлаш үчүн бир пурсәт йаритип бәргәнликини ейтти.
түркийә авази радийоси хәвири: гиретсийә баш министири кирйакос мичотакис гиретсийәниң дөләтлик телевизийә қанили (ERT) ниң зийаритини қобул қилғанда бәргән байанатида, түркийә – гиретсийә мунасивәтлири һәққидә тохталди.
мичотакис қаһраманмарашни мәркәз қилип йүз бәргән вә түркийәниң 11 вилайити билән сүрийәгә еғир талапәт йәткүзгән 7.7, 7.6 баллиқ йәр тәврәш апити һәққидә мундақ деди: «түркийә вә сүрийә хәлқлиригә йар - йөләк болуш, бизниң инсанпәрвәрлик мәсулийитимиздур. биз кишиләрни харабиликтин қутқузуш үчүн тунҗи түркүмдә йардәм әвәткәнләрниң қатарида идуқ.»
гиретсийә баш министири кирйакос мичотакис гиретсийәниң түркийәгә йар-йөләк болушиниң инсанпәрвәрлик һәрикәт икәнликини, буниң дипломатийә сийасити билән һечқандақ мунасивитиниң йоқлуқини қәйт қилди, һәмдә түркийә хәлқи билән гиретсийә хәлқини бир – биридин айриветидиған һечқандақ нәрсиниң йоқлуқини тәкитләп мундақ деди: «биз қошна дөләтләрмиз, шуңа сақлиниватқан мәсилилиримизни тинч йол билән һәл қилишни өгинишимиз керәк.»
мичотакис сөзини мундақ давамлаштурди: «бәзи әһвалларда, тил билән тәсвирләп болғусиз еғир азаб - оқубәтләр вә дәрд – әләмләрни кәлтүрүп чиқарған бу йәр тәврәш апити, гиретсийә – түркийә мунасивәтлирини қайтидин ениқлаш үчүн бир пурсәт болуп қелиши мумкин.»
гиретсийә баш министири кирйакос мичотакис йәр тәврәш апитидин кейин, икки дөләт хәлқлири оттурисида писхикилиқ һесдашлиқниң туғулғанлиқини тәкитләп мундақ деди: «буниңға әһмийәт беришимиз бизниң мәҗбурийитимиздур, җүмлидин бу мениң шәхсий мәҗбурийитимдур.»
гиретсийә ташқи ишлар министири никос дәндиас болса, дөлитиниң түркийәниң йәр тәврәш апити кәлтүрүп чиқарған дәрд – әләмлирини йәңгиллитиш үчүн қолидин келишичә тиришчанлиқ көрситидиғанлиқини қәйт қилди.
дәндиас сәланиктә өткүзүлгән бир паалийәттә қилған сөзидә, инсаний дәрд – әләмләрниң дөләт чегралирини етирап қилмайдиғанлиқини әскәртти, һәмдә гиретсийәниң иҗтимаий вә тарихий әхлақиниң һәмкарлиқни чиқиш нуқта қилидиғанлиқини байан қилип мундақ деди: «бу сәмимийлик асасида қисқа вақит ичидә техиму бихәтәр бир келәчәк бәрпа қилиш мумкин.»
никос дәндиас гиретсийәниң һәм йавропа һәм йавропа иттипақиға әза дөләт сүпитидә түркийәгә йар - йөләк болидиғанлиқини әскәртип мундақ деди: «бу һалқилиқ пәйттә гиретсийә түркийә хәлқигә йар - йөләк болиду, күчиниң баричә түркийә хәлқиниң азаб - оқубәтлирини йәңгиллитишкә тиришиду.»
6 – феврал түркийәниң 11 вилайитигә еғир талапәт йәткүзгән қаһраманмарашни мәркәз қилип йүз бәргән 7.7, 7.6 баллиқ «100 йилдин буйанқи әң чоң балайиапәт» дәп аталған йәр тәврәш апити, миңларчә кишиниң җениға замин болди.
