нато түркийәгә панаһлиниш әслиһәлирини әвәтиду
шималий атлантик әһди тәшкилати түркийәниң 10 вилайитидә йүз бәргән йәр тәврәш апитидә талапәткә учриғанлар үчүн панаһлиниш әслиһәлирини әвәтишни қарар қилди.
түркийә авази радийоси хәвири: шималий атлантик әһди тәшкилати 6 – феврал күни қаһраманмарашни өз ичигә алған түркийәниң 10 вилайитидә йүз бәргән вә «100 йилдин буйанқи оң чоң балайиапәт» дәп аталған йәр тәврәш апитидә талапәткә учриғанлар үчүн панаһлиниш әслиһәлирини әвәтишни қарар қилди.
шималий атлантик әһди тәшкилатиниң байанатиға қариғанда, нато әвәтидиған панаһлиниш әслиһәлири адәттә шималий атлантик әһди тәшкилатиниң һәрбий маневирлири вә һәрбий һәрикәтлиридә ишлитилидиған қараргаһ әслиһәлиридин тәркиб тапидикән. бу әслиһәләр иссиниш, генератор вә давалаш саһәлири қатарлиқ әслиһәләрни өз ичигә алидикән.
шималий атлантик әһди тәшкилати һәрбий даирилири, һазир италийәниң таранто райониға җайлашқан нато йардәм бериш иштаби җәнубий һәрбий һәрикәт мәркизидә сақлиниватқан панаһлиниш әслиһәлирини әвәтиш үчүн әң мувапиқ әшйа обороти вә тошуш йоллири һәққидә пилан түзмәктә икән.
бу әслиһәләр, шималий атлантик әһди тәшкилати дөләтлири әвәтишкә башлиған қишлиқ шараитқа мас келидиған чедирларниң әтрапиға орунлаштурулидикән.
бу әслиһәләрни әвәтиш хизмитигә, шималий атлантик әһди тәшкилатиниң йавропадики иттипақдаш армийәниң алий қомандани (SACEUR) генерал кристофир каволи рәһбәрлик қилидикән.
шималий атлантик әһди тәшкилати баш катипи столтенберг, иттипақдаш дөләтләрниң бу қараридин интайин хурсән икәнликини тәкитләп мундақ деди:
«шималий атлантик әһди тәшкилати иттипақдишимиз түркийә билән күчлүк һәмкарлиқ орнитиватиду. бу панаһлиниш әслиһәлириниң әвәтилиши қанчилиған кишиләрни қутқузушта муһим рол ойнайду. шималий атлантик әһди тәшкилатиниң иттипақдашлири вә һәмраһлири түркийәдики издәш - қутқузуш паалийәтлиригә қойуқ йардәм бәрмәктә. биз еһтийаҗлиқ кишиләргә йардәм бериш үчүн қолидин келишичә тиришчанлиқ көрситишни давамлаштуримиз.»
