американиң калифорнийә иштатида боран вә шиддәтлик йамғур сәвәбидин 19 киши қаза қилди

түркийә авази радийоси хәвири: калифорнийә геологийәлик тәкшүрүш идарисиниң байанатида, деңиз қолтуқи райониниму өз ичигә алған тәхминән 8 милйон киши йашайдиған районда кәлкүн хәвипиниң давамлишиватқанлиқи вә райондики һава райи һадисилириниң йеқиндин көзитиливатқанлиқи билдүрүлди.

байанатта, 30 - декабирдин (2022) буйан калифорнийә иштатида 400 дин артуқ тағ сийрилип чүшүш вәқәси йүз бәргәнлики вә давамлишиватқан шиддәтлик йамғурниң топилиқ йәрләрдә йеңи лай кәлкүни вә тағ сийрилип чүшүш вәқәлирини кәлтүрүп чиқирши мумкинлики уқтурулди.

калифорнийәниң йәрлик мәсуллири вә таратқулириниң хәвиригә асасланғанда, 27 - декабирдин (2022) буйан давамлашқан қаттиқ боран вә шиддәтлик йамғур сәвәбидин йәнә 2 киши җенидин айрилип, омумий қаза қилғанларниң сани 19 ға өрлигән.

дөләтлик һава райи идариси (NWS) ниң мәсули давид лавренс твиттерда һәмбәһирлигән учурида: «сәйшәнбә күнигә киргинимиздә иштатниң көп қисим җайлирида һава райиниң тинчлинишини үмид қилмақтимиз» деди вә һәптә ахириғичә йамғур йағмайдиғанлиқиниң мөлчәрлиниватқанлиқини ейтти.