лавров ғәрбниң русийәгә «арилашма уруш» ачқанлиқини илгири сүрди

түркийә авази радийоси хәвири: сергей лавров, рус патрикханиси тәрипидин пайтәхт москвада уйуштурулған 24 - нөвәтлик дунйа рус хәлқ мәҗлиси йиғиниға син көрүнүшлүк учур әвәтти؛ у, учурида ғәрбниң русийәгә қарши «тохтитиш сийасити» йолға қойғанлиқиға ишарәт қилип؛ «дунйадики һөкүмранлиқ орнини сақлап қелишқа урунуватқан америка қошма иштатлири башчилиқидики ғәрб дөлитимизгә қарши арилашма уруш қозғиди. дүшмәнләр русийә иқтисадини вәйран қилиш, дөләт ичидики сийасий муқимлиқни бузуш вә тоқунуш саһәсидә бизни мәғлуп қилиш, ахирида әсирлик дөлитимизни көрүнәрлик дәриҗидә аҗизлитиш, һәтта вәйран қилишни көзлимәктә. улар бу (нийәтлири)ни йошурмайду» деди.

у, ғәрб дөләтлириниң украинани һәр хил усуллар билән қоллаш арқилиқ русийәни тосимақчи болуватқанлиқини тилға елип: «вашингтон вә шималий атлантик әһди тәшкилати — нато иттипақдашлири украинадики йеңи натсистларға қорал йәткүзүп беришни күчәйтмәктә, истихбарат (дөләт бихәтәрлик) учурлирини ортақлашмақта, украинаға чәт әллик йалланма әскәрләрни әвәтмәктә. буларниң һәммиси уларни мәсилиниң бир парчисиға айландуриду» дегәнләрни қәйт қилди.

ғәрб дөләтлириниң русийә пиравославийә черкави рәһбири кирилға җаза йүргүзгәнликини билдүргән сергей лавров: «ғәрб рус черкавиниң мәниви қиммәт қаришиға бузғунчилиқ қилмақчи болуватиду һәмдә рус дунйаси билән чәт әлдики җәмийәтлиримизгә күчлүк бесим ишләтмәктә» деди.

у йәнә: «вашингтон вә униңға әгәшкән йавропа дөләтлириниң русийәни йалғузлаштуруш вә уни хәлқара сийасәттин қоғлап чиқириш урунушлириниң мәғлуп болушқа мәһкум» икәнликини сөзлиригә илавә қилди.