гирузийә түркийәдин бироневик сетивалиду
түркийә һәрбий завут вә кемисазлиқ тиҗарити пай чәклик ширкити билән гирузийә дөләт мудапиә министирлиқи оттурисида шималий атлантик әһди тәшкилати — нато өлчәмлиригә уйғун бироневик машина билән тәминләш келишими имзаланди.
түркийә авази радийоси хәвири: гирузийә дөләт мудапиә министирлиқи йазма байанат елан қилип, түркийә һәрбий завут вә кемисазлиқ тиҗарити пай чәклик ширкити мәсуллири билән министирлиқ әмәлдарлириниң түнүгүн сөһбәт өткүзгәнликини, «түркийә тәрәп билән имзаланған келишимгә асасән, мудапиә қисимлириниң нато өлчимигә мас келидиған йеңи броневик машиниларни тапшуруп алидиғанлиқи»ни билдүрди.
байанатта: «гирузийә дөләт мудапиә армийәсиниң мәзкур бироневиклар билән қоралландурулуши гирузийәниң мудапиә иқтидарини күчәйтишкә вә түркийә билән гирузийә оттурисидики һәмкарлиқни чоңқурлаштурушқа муһим төһпә қошиду» дейилди.
келишим, түркийә һәрбий завут вә кемисазлиқ тиҗарити пай чәклик ширкити баш директори әсад ақгүн вә грузийә муавин мудапиә министири гиорги хайндрава тәрипидин имзаланди.
түркийә һәрбий завут вә кемисазлиқ тиҗарити пай чәклик ширкитиниң твиттердики адресида елан қилинған байанаттиму: «гирузийә дөләт мудапиә министирлиқи билән йуқири иқтидарлиқ тошуғучи бироневик машина билән тәминләш тоғрисида келишим имзаланди. буниң түркийә вә гирузийә үчүн хәйрлик болушиға тиләкдашмиз, һәмкарлиқимизниң техиму тәрәққий қилған һалда давамлишишини үмид қилимиз» дегән ибариләргә орун берилди.
