падишаһ 2-елизабетниң дәпнә мурасимиға нурғун дунйа рәһбәрлири қатнашти

түркийә авази радийоси хәвири: әнглийә айал падишаһи 2-елизабетниң дәпнә мурасими пайтәхт лондондики вестминстер аббей черкавида әнқәрә вақти 13.00, үрүмчи 16.00 да башланди. мурасимға, айал падишаһниң пәрзәнтлиридин падишаһ 3-чарлез, мәликә аннә, шаһзадә андру, ханиш камилла, шаһзадә едвард, галлер шаһзадиси вилйам вә айали, галлер мәликиси кәйт, шаһзадә харрий вә айали билән хан җәмәтиниң әзалири қатнашти.

мурасимға, түркийәгә вакалитән ташқи ишлар министири мәвлүт чавушоғлу қатнашти.

тәхминән 2 миң меһманниң қатнишиши билән өткүзүлгән дәпнә мурасимида, америка пирезиденти җо байдин вә айали җил байдин, фирансийә пирезиденти макрон , австиралийә баш министири антони албанес, канада баш министири җастин треду, полша баш министири матейусз моравички, италийә пирезиденти сергийо маттарелла, иреландийә пирезиденти мишил хигинс, украина пирезиденти володимир зеленский вә айали олена зеленский қатарлиқ 500 гә йеқин дунйа рәһбири һәмдә башқа йуқири дәриҗилик рәһбәрләр орун алди.

әнглийә баш вәзири лиз трас мурасимда қисқа сөз қилди вә инҗилдин нәқил кәлтүрди. кантербурий (Canterbury) баш епскопи сөзидә, дунйада наһайити аз рәһбәрниң айал падишаһ сазавәр болған һөрмәткә игә икәнликини билдрүди.

айал падишаһ 2-елизабет йолдиши мәрһум шаһзадә филип билән той қилған җай болған вестминстер аббей черкавидики мурасимдин кейин, дөләт миқйасида икки минут сүкүттә турулди. айал падишаһ 2-елизабетниң таҗи қойулған вә гүл-чечәкләр билән қапланған җиназа, хайд бағчисиниң (Hyde Park) кириш қисмидики виллиңтон арчқа (Wellington Arch) апирилди вә арқидин дәпнә қилинидиған виндсорға (Windsor) апирилди.

әнглийәниң әң узун тәхттә олтурған һөкүмдари айал падишаһ 2-елизабет 8-сентәбир дәм еливатқан (2022) шотландийәдики балморал қәләсидә 96 йешида вапат болған иди.