иран банка системилириға чәт әлдин тор арқилиқ киришни тохтатти
иран, тор һуҗумлириниң алдини елиш тәдбирлири даирисидә дөләт сиртидин иран банка системилириға киришниң вақтинчә чәкләнгәнликини уқтурди.
түркийә авази радийоси хәвири: иран рәсмий хәвәр агентлиқи — IRNA , теһран һөкүмитиниң, тор һуҗумлириға тақабил туруш органлириниң тәвсийәсигә асасән, иран банка системисини дөләт сиртидин зийарәт қилишни вақтинчә тохтитип қойғанлиқини хәвәр қилди؛ лекин хәвәрдә, қарарниң тәпсилати тоғрисида мәлумат берилмиди.
бу чәклимиләрниң тор тәһдитиниң алдини елиш үчүн мәсул органларниң мәслиһәти билән қоллинилғанлиқи көрситилгән хәвәрләрдә, һечқандақ учур берилмигән.
йеқинқи йиллардин буйан «җавабкариниң исраилийә икәнлики илгири сүрүлгән» бир қатар тор һуҗумлириға дуч кәлгән иран, исраилийәгә қарши тор һуҗуми тәшкилләш билән әйибләнмәктә.
14 – ийун исраилийәдики «тәкшүрүш нуқтиси тәтқиқати» намлиқ тор бихәтәрлики ширкити иранниң тор һуҗуми қозғиғанлиқини илгири сүрүп, кимлик учурлирини қолға чүшүрүш ғәрәзлик тор һуҗумида исраилийәниң сабиқ ташқи ишлар министири тзипи ливни вә америка қошма иштатлириниң тел авивда вәзипә өтигән сабиқ баш әлчиси қатарлиқ исраилийә вә американиң йуқири дәриҗилик әмәлдарлириниң зәрбә обейкти қилип талланғанлиқини, иран болуши мумкин дәп қариливатқан хаккерларниң бир қисим әмәлдарларниң електронлуқ хәт алақисини қолға чүшүрүвалғанлиқини билдүргәниди.
иранда болса, ахирқи қетим 6-айниң 27-күни иранниң хузистан өлкисидики әң чоң полат - төмүр ширкәтлириниң бири тор һуҗумиға учриғандин кейин, ширкәткә тәвә үч завутта ишләпчиқиришниң тохтитилғанлиқи елан қилинғаниди.
