yawropa ittipaqi süriyede sadir qiliniwatqan jinayi qilmishlarni eyiblidi
yawropa ittipaqi, süriyede asasliqi beshshar esed hakimiyiti we uning ittipaqdashlirining nurghunlighan puqralarning ölüshini keltürüp chiqarghan jinayi qilimishlirini eyibleydighanliqini uqturdi.
türkiye awazi radiyosi xewiri: yawropa ittipaqining tashqi munasiwet we bixeterlik siyasiti boyiche aliy wekili josép borrélning ishxanisi, birleshken döletler teshkilati (b d t) kishilik hoquq aliy komissarliqining yéqinqi 10 yilda süriyede texminen 307,000 puqraning öltürülgenliki toghrisidiki doklati heqqide yazma bayanat élan qilip, «yawropa ittipaqi on yildin köprek waqittin buyanqi toqunushlarda nurghun puqraning ölüshini keltürüp chiqarghan bu jinayetlerning sadir qilinishini eng küchlük eyibleydu. qiynash usullirini öz ichige alghan bu jinayetlerning asasliqi süriye hakimiyiti we uning ittipaqdashliri teripidin sadir qilindi» dédi.
doklatning süriyede toqunushlar dawamlishiwatqan bolghachqa, adem ölüsh ehwallirigha dair sanliq melumatlarni öz ichige almighanliqigha isharet qilinghan bayanatta, «toqunush bashlanghandin buyan, yawropa ittipaqi xelqara insanperwerlik qanunigha xilapliq qilghanlarni jawabkarliqqa tartishqa chaqiriq qilip kelmekte» dégen ibarilerge orun bérildi.
«yawropa ittipaqi süriye xelqi bilen bir septe turup, süriyening birliki, igilik hoquqi we zémin pütünlükini qollashni dawamlashturidu» déyilgen bayanatta, kirizisni hel qilishning birdinbir charisining b d t xewpsizlik kéngishining 2254-nomurluq qararida békitilgen yol xeritisini emeliyleshtürüsh musapisini bésip ötidighanliqi tekitlendi.
