putin ukrainadin ashliq chiqirishni tosmighanliqlirini ilgiri sürdi

türkiye awazi radiyosi xewiri: rusiye pirézidénti wladimir putin moskwagha ziyaretke kelgen hindonéziye pirézidénti joko widodo bilen körüshti.

u körüshüshning axbaratqa ochuq qismida élan qilghan bayanatida, dunya ashliq kirizisi mesilisi üstide toxtaldi.

u amérika basqan puli bilen ashliq mehsulatlirini sétiwalidighanliqini we bu sewebtin ashliq mehsulatliri bahasining örlep ketkenlikini ilgiri sürdi.

u: «bu ehwal tereqqiy qiliwatqan döletlerning weziyitini yamanlashturuwatidu. ashliq kirizisi tiragédiyege özgermesliki üchün muhim tedbirler yolgha qoyulushi kérek» dédi.

u rusiyening ukrainadin ashliqning éksport qilinishini cheklimigenlikini ilgiri sürüp: «ukraina hökümiti portlarning kirish éghizigha ména orunlashturdi. bu ménalarning tazilinishini we u yerlerdin ashliq chiqirishni hékim tosmaydu. bixeterlikke kapaletlik qilimiz» dédi.

u ukrainadin ashliqning ruméniye, polsha, bélarusiye we azaq déngizidiki portlar arqliq éksport qilghili bolidighanliqini bildürüp, b d t wekilliri bilen mezkur mesilide qoyuq alaqe qiliwatqanliqlirini qeyt qildi.

u dunyada 800 milyon tonna ashliq ishlepchiqirilghanliqini eskertip: «rusiye ötken yili (2021) dunyadiki bazarlarni 40 milyon tonna ashliq bilen teminlidi. bu yil (2022) 50 milyon tonna ashliq bilen teminleymiz» dédi.

hindonéziye pirézidénti widodo 24-féwral bashlanghan ukraina-rusiye urushining dunyadiki ashliq mehsulatlirining éksportigha selbiy tesir körsetkenlikini bildürüp: «rusiyedin yémek-ichmek mehsulatliri, ukrainadin ashliq éksporti bolmay turup, dunyada yémek-ichmek éksportini qaytidin bashlash mumkin emes» dédi.

widodo tereqqiy tapqan yette dölet guruhi rehberliridin yémek-ichmek mehsulatliri bilen oghutqa qaritilghan émbargolarning yürgüzülüshini emeldin qaldurushni telep qilghanliqini qeyt qildi.