téksas ishtatidiki bashlanghuch mektepte qoralliq hujum yüz berdi
amérikaning téksas ishtatidiki bir bashlanghuch mektepte yüz bereen hujumda, 18 bala we üch qoramigha yetken kishi bolup, jemiy 21 kishi jénidin ayrildi.
türkiye awazi radiyosi xewiri: téksas ishtatining kéngesh palata ezasi roland gutérréz s n n téléwiziyesining ziyaritini qobul qilghanda, weqede hazirghiche 18 bala bilen üch qoramigha yetken kishining jénidin ayrilghanliqini élan qildi.
uwaldé baziridiki rob bashlanghuch mektipide qoralliq hujum qilish weqesi peyda qilghan salwador ramosning (18 yash) saqchilar teripidin étip öltürülgenliki bildürüldi.
xewerlerde, gumandar salwador ramosning uwaldé bazirida olturidighanliqi, uning weqe peyda qilghan bashlanghuch mektepning yénidiki toluq ottura mektepning oqughuchisi ikenliki qeyt qilindi.
saqchilar hazirche weqening yüz bérishi sewebi toghrisida melumat élan qilmidi.
amérika pirézidénti jo baydin qoralliq hujum toghrisida: «xuda heqqide, biz qachanmu qoral lobisigha qarshi chiqimiz?» dédi.
asiya ziyaritidin qaytip kélip aqsarayda axbarat élan qilish yighini ötküzgen pirézidént jo baydin, pirézidéntliq hoquqini tapshuruwalghanda mushundaq söz qilishqa mejbur qalmasliq üchün dua qilghanliqini éytti.
u téxi bir hepte ilgiri niyu yorkning bufalo (Buffalo) shehiridimu qoralliq hujum qilish weqesi yüz bergenlikini xatirilitip, dölet ichide barghanséri köpiyiwatqan qoralliq hujumlar toghrisida alahide toxtaldi.
dölet maarip jemiyiti téksas ishtati oqutquchilar jemiyiti bilen birlikte élan qilghan bayanatta: «dölet-mekteplirimiz, oqughuchilar we oqutquchilar üchün eng bixeter jaylardin biri bolushi kérek. siyasetchilerning mesuliyetni öz üstige élip, qoral bixeterliki mesilisini hel qilishi üchün yene qanchilik qoralliq hujum yüz bérishi kérek?» dep soal qoyuldi.
amérika oqutquchilar fédératsiyesining bashliqi randi wéyingartén (Randi Weingarten) qoralliq hujumgha naraziliq bildürüp: «ata-anilar bu dölette balilirining mektepte bixeter ikenlikidin xatirjem emes» dédi.
s n n ning xewirige asaslanghanda, amérikada bu yil (2022) béshidin tartip bu qétimqi qoralliq hujumni chiqiriwetkende, mekteplerde yüz bergen qoralliq hujum qilish weqeliride eng az dégende 10 kishi jénidin ayrilip, 51 kishi yarilanghan.
