ursula fondérléyén: ukraina urushta ghelbe qilishqa mejbur
fondérléyén 24-féwraldin tartip dawamlishiwatqan ukraina-rusiye urushi toghrisida toxtilip: «ukraina bu urushta ghelbe qilishqa mejbur.rusiye pirézidénti putinning urushqaqliqi istratégiyelik muweppeqiyetsizlik bolushi kérek» dédi.
türkiye awazi radiyosi xewiri: yawropa ittipaqi komitéti bashliqi ursula fondérléyén dawos yighini dep bilinidighan dunya iqtisad munbiri (WEF) ning mexsus yighinida söz qilghanda, ukrainadiki weziyet toghrisida toxtaldi.
u: «bu yalghuz ukrainaning mewjut bolush mesilisila emes, shundaqla yawropa xewpsizliki mesilisimu emes. bu barliq xelqaraliq tertipke munasiwetlik mesile we xelqaraliq tertipke soal belgisi peyda qilidu. shunga, rusiyening urushqaqliqigha qarshi turush, barliq xelqaraliq jemiyetlerning wezipisi» dédi.
u yawropa ittipaqi bolush süpiti bilen, ukrainaning ghelbe qilishi we qaytidin öz kélechikini belgilishi üchün qolidin kélishiche tirishidighanliqini tekitlep: «ukraina bu urushta ghelbe qilishqa mejbur. putinning urushqaqliqi istratégiyelik muweppeqiyetsizlik bolushi kérek» dédi.
u yawropa ittipaqining tarixida tunji qétim hujumgha uchrawatqan döletke herbiy yardem qiliwatqanliqini eskertip: «barliq iqtisadimizni seperwer qiliwatimiz. yawropa ittipaqi teripidin üchinchi dölet üchün hazirghiche tüzülgen we eng chong makro-iqtisad yardem pilani bolghan 10 milyard yawrodin köp makro iqtisad yardimini teklip qilduq. mumkin bolsa, rusiyening tonglitip qoyulghan mal-mülüklirini ishlitishtin tartip hemme charelerni ishqa sélishimiz kérek» dédi.
u sözini mundaq dawamlashturdi:
«bügün rusiyening topchilar qismi ukrainadiki ashliq iskilatlirini qeste bombardiman qiliwatidu. qara déngizdiki herbiy paraxotliri bughday we aptapperes uruqi bésilghan ukraina paraxotlirini muhasirege éliwatidu. bu nomus qilarliq heriketlerning netijilirini hemme körüwatidu. dunyada bughday bahasi téz ösüwatidu. ashliq yétishmeydighan döletler we ajiz orundiki jemiyetler buning tesirige uchrawatidu. liwanda nan bahasi %70 östi. odéssadin éksport qilinghan yémek-ichmekler somaligha yétip baralmidi. buninggha qoshumche, rusiye ashliq éksportini toxtitidighanliqi toghrisida tehdit séliwatidu. dunyadiki ashliq bahasini östürüsh üchün ashliqlarni qolida tutup turuwatidu yaki siyasiy jehettin qollash bedilige bughday sodisi qiliwatidu.»
