baydin kuad (Quad) ittipaqining «ötkünchi moda» emeslikini tekitlidi

türkiye awazi radiyosi xewiri: amérika qoshma ishtatlirining pirézidénti jo baydin, töt terep bixeterlik diyalogi — kuad (Quad) ittipaqining «ötkünchi moda» emeslikini, uning yillarning ötüshige egiship tereqqiy qilishini ümid qilidighanliqini éytti.

yaponiye bash weziri kishida fumioning sahibxanliqida chaqirilghan töt terep bixeterlik diyalogi — «kuad» bashliqlar yighini paytext tokyoda dawam qilmaqta.

amérika pirézidénti baydin, awstraliyening yéngi bash ministiri antoniy albanés we hindistan bash ministiri naréndra modimu qatnashqan yighinning taratqulargha ochuq bölümidiki sözide, «töt terep hemkarliqining muhimliqi»ni tekitlep: bu ittpaqning «ötkünchi moda emeslikini, yillarning ötüshige egiship tereqqiy qilishni ümid qilidighanliqini éytti.

baydin özlirining hindi-tinch okyandiki dostane démokratik döletler bilen birlikte ortaq qimmet qarashlarni muhapizet qilidighanliqlirini tekitlidi.

hindistan bash ministiri modimu « kuadning ishench we qetiylikining rayondiki démokratik döletlerge küch béghishlighanliqi»ni  we ortaq nishanning «erkin we ochuq hindi-tinch okyan»ni saqlap qélish ikenlikini otturigha qoydi.

antoniy albanésmu yéngi awstraliye hökümitining «téximu küchlük we téximu tayinishchan hindi-tinch okyan yaritish üchün kuadni qollaydighanliqi»ni bildürüp, «bizning hemkarliqimiz démokratiyeni, qanun bilen idare qilishni asas qilidu» dédi.

sahibxan bash wezir kishida, hindi – tinch okyan rayonining rusiye-ukraina kirizisigha oxshash «tajawuzchiliq heriketliridin saqlinishi kérek»likini qeyt qildi.

kuadning «erkin we ochuq hindi-tinch okyan» nishanida ching turushining muhimliqini tekitligen kishida, bu teshkilatni jiddiy rayonluq mesililerde sherqiy jenubiy asiya elliri ittipaqi döletliri bilenmu hemkarlishishqa chaqirdi.