украиналиқ мусапирларниң сани 8 милйондин ашти
б д т русийәниң таҗавузиға учриған украинадин қошна дөләтләргә һазирғичә 5 милйон 264 миң 767 мусапирниң өткәнликини, урушта җәмий мусапир саниниң 8.3 милйонға чиққанлиқини елан қилди.
түркийә авази радийоси хәвири: б д т мусапирлар алий комиссарлиқи украинадики мусапирлар киризиси тоғрисида мәлумат елан қилди.
буниңға асасланғанда, 24-февралдин 25-апрелғичә (2022) украинадин 5 милйон 264 миң 767 киши қошна дөләтләргә өткән болуп, буларниң йерими полшада икән.
б д т мусапирлар алий комиссарлиқиниң байанатчиси шабийа мәнту (ShabiaMantoo) шивейтсарийәдики ишханисида өткүзүлгән ахбарат елан қилиш йиғинида, урушта җәмий мусапирлар саниниң 8.3 милйонға йетидиғанлиқини пәрәз қиливатқанлиқлирини, мусапирлар алий комиссарлиқи вә шериклириниң украина мусапирлирини қоллаш үчүн 1.85 милйард доллар фонд үстидә издиниватқанлиқини билдүрди.
у украина ичидә өй-маканлиридин айрилған пуқралар саниниң 7.7 милйонға йәткәнликини әскәртип: «бу уруш сәвәбидин икки айда җәмий 12.7 милйон киши өй-маканлиридин айрилди» деди.
б д т инсанпәрвәрлик ишлири кординатсийә ишханисиниң байанатчиси йенс лаерк (Jens Laerke) украина ичидә инсанпәрвәрлик йардәмгә еһтийаҗлиқ болған пуқралар саниниң 12 милйондин 15.7 милйонға йәткәнликини қәйт қилди.
йенс лаерк украинада алди билән урушниң әң еғир тәсиригә учриған тәхминән 8.7 милйон киши үчүн 2.25 милйард доллар фондқа еһтийаҗлиқ икәнликлирини билдүрди.
