блинкен илһам әлийев вә пашинйан билән көрүшти

түркийә авази радийоси хәвири: америка ташқи ишлар министири антони блинкен әзәрбәйҗан пирезиденти илһам әлийев билән әрменийә баш министири никол пашинйан билән көрүшкәндә, «районда җиддийчиликни күчәйтмәслик» вә «тинчлиқ сөһбәтлиригә әһмийәт бериш» ни чақириқ қилди.

америка ташқи ишлар министирлиқиниң йазма байанатида, министир блинкенниң әзәрбәйҗан пирезиденти илһам әлийев вә әрменийә баш министири никол пашинйан билән телефонда айрим-айрим көрүшкәнлики билдүрүлди.

байанатта билдүрүлишичә, ташқи ишлар министири блинкен һәр икки рәһбәр билән көрүшкәндә, русийәниң украинаға қилватқан һуҗумлирини әйиблигәнликлирини вә бу әһвални қобул қилғили болмайдиғанлиқини ейтқан.

у әзәрбәйҗан билән әрменийә оттурисида сүкүтни бузмаслиқ, җиддийчиликни күчәйтмәслик керәкликини вә дипломатийәни ишқа селишни тәкитләп, әлийев билән пашинйанға «икки дөләт оттурисидики тинчлиқ сөһбәтлиригә әһмийәт бериш» ни чақириқ қилди.

у әзәрбәйҗан пирезиденти илһам әлийев билән әрменийә баш министири пашинйан оттурисида бүгүн (6-апрел) өткүзүлүши пилан қилинған учришишниң әһмийитини тәкитләп, американиң һәр икки дөләткә дипломатик мәнидә һәр қайси мәсилиләрдә йардәм қилишқа тәййар икәнликини қәйт қилди.

у өткән һәптидики байанатида, әзәрбәйқан пирезиденти илһам әлийевгә имканийәтниң беричә әң қисқа вақит ичидә әрменийә билән тинчлиқ келишими имзалиши керәкликини билдүрүп, «земин пүтүнлүки вә хәлқаралиқ чеграларниң муқәддәсликини өзара етирап қилиш, арқидин чеграларни бәлгиләш асасида кавказға тинчлиқ келиду дәп ойлаймән» дегән иди.

әрменийә баш министири пашинйан кәң даирилик тинчлиқ келишими музакирәлирини дәрһал башлашқа тәййар икәнликлирини елан қилған иди.