дунйа русийәниң буча шәһиридики вәһшийликини әйиблимәктә

түркийә авази радийоси хәвири: нато баш катипи столтенберг русийәниң украинадики пуқраларға йүргүзгән «вәһшийлик» ләрни қобул қилғили болмайдиғанлиқини вә җавабкарларниң сотлиниши керәкликини ейтти.

нато баш катипи столтенберг америка с н н телевизийә қанилиниң «бирликниң әһвали» намлиқ пирограммиға қатнашти.

у русийә армийәсиниң украинадики уруш җинайәтлири тоғрисида тохтилип: «бу, биз йавропада бир қанчә он йилдин бери көрмигән пуқраларға қилинған вәһшийлик. пуқраларниң һуҗум нишани қилинишини вә өлтүрүлүшини қәтий қобул қилғили болмайду» деди.

у вәһшийликләрни ахирлаштуруш керәкликини тәкитләп, русийә пирезиденти владимир путинниң бу урушни тохтитиш мәсулийити барлиқини билдүрди.

у хәлқара җинайи сот мәһкимисиниң украинадики уруш җинайәтлири үстидә дело турғузуши, барлиқ һәқиқәтләрни ашкарилиши вә җавабкарларни сотқа тартишниң интайин муһим икәнликини тәкитләп: «бу сәвәбтин, хәлқара җинайи ишлар сот мәһкимиси тәрипидин қилиниватқан тәкшүрүшни мәмнунлуқ билән қарши алимән» деди.

б д т баш катипи антонийо гутеррс бу һәқтә елан қилған байанатида, украинаниң буча шәһиридә өлтүрүлгән пуқраларниң җәсәтлиридин чөчүп кәткәнликини ейтти.

у пуқраларниң өлүмигә мунасивәтлик тәкшүрүш башлашни чақириқ қилип: «мустәқил тәкшүрүш, сотқа тартиш үчүн зөрүр» деди.

америка ташқи ишлар министири антони блинкен буча шәһиридә тепилған пуқраларниң җәсәтлири мәсилисидә русийәни әйиблиди.

у твиттерда учур һәмбәһирләп: «бучада вә пүткүл украинада кремил күчлириниң вәһшийликини шиддәт билән әйибләймиз» деди.

у пуқраларға йүргүзүлгән қәлиамниң җавабкарлирини җазалаш үчүн қоллиридики барлиқ вастиләрдин пайдилинидиғанлиқлирини, йүз бәргән вәһшийликләрни һөҗҗәтләштүрүп, бу һәқтики мәлуматларни ортақлишидиғанлиқлирини қәйт қилди.

әнглийә баш вәзири борис җонсонму русийәниң украинаниң ирпин вә буча шәһәрлиридә бигунаһ пуқраларға қилған «пәскәшләрчә һуҗумлири» ниң, путин вә армийәсиниң «уруш җинайити» өткүзгәнликиниң йәнә бир испати икәнликини тәкитлиди.

баш вәзир борис җонсон йазма байанатида, кремилниң инкарлири йаки тәтүр тәшвиқат қилишиниң, һәммә тоғра икәнликини билгән шәйийләрни йошуралмайдиғанлиқини әскәртип: «путин амалсиз, ишғал һәрикити мәғлуб болмақта. украинаниң қәтий ирадәси һечқачан бунчилик күчлүк болуп бақмиған иди» деди.

у әнглийәниң, хәлқара җинайи ишлар сот мәһкимисиниң украинада өткүзүлгән җинайәтләр тоғрисидики тәкшүрүшини қоллаш сепиниң алдинқи қатаридин орун алғанлиқини билдүрүп, украинаға йеңи мутәхәссис тәптиш хадимлириниң әвәтилидиғанлиқини қәйт қилди.

гиретсийә баш министири кирйакос мичотакис твиттерда һәмбәһирлигән учурида, гиретсийәниң украинани қоллайдиғанлиқини билдүрүп: «бучада пуқраларға қарши өткүзүлгән җинайәтләр кишини чөчүтиду. җинайәтчиләр сотқа тартилиши керәк» деди.

италийә баш министири марийо драги йазма байанатида, буча вә башқа шәһәрләрдин кәлгән фотограф вә видеоларниң «кишини чөчүтидиғанлиқи» ни билдүрди.

у: «қолида төмүрниң сунуқиму йоқ пуқраларға йүргүзүлгән қәтлиам вәһшийлики наһайити қорқунчлиқ вә чидап турғили болмайду. русийә даирилири дәрһал дүшмәнлик қилишни ахирлаштуруши, пуқраларға қилиниватқан вәһшийликләрни тохтитиши вә йүз бәргән вәһшийликләрниң һесабини бериши керәк. италийә бу вәһшийликни қәтийлик билән әйибләйду, шундақла украина вә хәлқи билән биргә икәнликини билдүриду» деди.

испанийә баш минстири педро санчезму пайтәхт мадридта қилған сөзидә, буча шәһиридин чекингән русийә әскәрлириниң арқисида қалдурған пуқраларниң өлүмлиригә мунасивәтлик көрүнүшләрниң, уруш җинайити икәнликиниң испати икәнликини илгири сүрди.

у: «бу уруш җинайәтлирини өткүзгәнләрниң җазасиз қалмаслиқи вә инсанийәткә қарши өткүзүлгән вә ирқий қирғинчилиқ дәп аташқиму болидиған мәзкур вәқәгә сәвәбчи болғанларниң, хәлқара җинайи ишлар сот мәһкимисидә сотқа тартилиши үчүн мумкин болған имканийәтләрниң һәммисидин пайдилинимиз» деди.

украина армийәси 1-апрел (2022) пайтәхт кийев әтрапидики буча шәһирини русийә армийәсидин азад қилғанда, харабиликкә айланған вә кочилири җәсәткә толуп кәткән бир шәһәр дунйаниң көз алдида намайан болған иди.