җонсон русийәниң нефити вә тәбиий газидин қутулушниң муһимлиқини тәкитлиди

түркийә авази радийоси хәвири: әнглийә баш вәзири борис җонсон канада баш министири җастин треду вә голландийә баш министири марк рутте йавропа дөләтлириниң русийә нефити вә тәбиий газиға тайинип қелиштин қутулушиниң муһим икәнликини, әмма буниң қәдәмму қәдәм әмәлгә ашурулуши керәклики тоғрисида агаһландурди.

әнглийә баш вәзири борис җонсон 10-номурлуқ ишханисида канада баш министири җастин треду вә голландийә баш министири рутте билән 24-февралдин (2022) буйан давамлишиватқан украина-русийә урушиға мунасивәтлик көрүшүшини әмәлгә ашурғандин кейин, ахбарат елан қилиш йиғини өткүзди.

 у йавропаниң русийәниң нефити вә тәбиий газиға тайинип қелиши тоғрисида тохтилип: «русийә һидро карбонлириға тайинип қелиштин йирақлишиш пүтүнләй тоғра болидиған иш, әмма буни қәдәмму қәдәм әмәлгә ашурушимиз керәк» деди.

у: «русийәдин бир кечидила нефит вә тәбиий газ ишлитишни тохтатқили болмайду. бу дунйадики һәммә дөләтниң қилалайдиған иши әмәс» деди вә һәр қайси дөләтләрниң енергийә мәсилисидә охшимайдиған тайинишчанлиқлириниң барлиқидин бешарәт бәрди.

голландийә баш министири рутте йавропаниң русийә тәбиий гази вә нефитиға тайинип қалғанлиқи тоғрисида: «ечинарлиқ һәқиқәт шуки, һазирғичә русийәниң нефити вә тәбиий газиға тайинимиз. русийә пирезиденти владимир путинниң кейинчә немә қилидиғанлиқини пәқәт тәхмин қилимиз» деди.

у русийә енергийәсигә тайиништин йирақлишиш қәдәмму қәдәм әмәлгә ашмиған әһвалда украинани өз ичигә алған башқа дөләтләр үчүн «еғир ақивәт» ләрниң болидиғанлиқи тоғрисида агаһландурди.

канада баш министири треду йавропа дөләтлириниң әмди русийәниң «ишәнчлик шерик әмәслики» ни тонуп йәткәнликини вә буни тәқдирләйдиғанлиқини билдүрди.

треду һәр қайси дөләтләрниң русийәниң нефити вә тәбиий газиға тайинип қелиштин қутулушиниң әһмийитини тәкитләп, канаданиң наһайити аз миқдарда русийәдин нефит импорт қилғанлиқини әскәртти.