американиң украинаға әскәр әвәтиш нийити йоқ
америка пирезиденти җо байдин украинаға әскәр әвәтиш нийити йоқлиқини ейтти.
түркийә авази радийоси хәвири: ақсарай байанатчиси җен псаки күндилик ахбарат елан қилиш йиғинида, русийәниң һәр қандақ бир вақитта украинани ишғал қилиш тәһдити давамлишиватқанлиқини, әмма буниң қачан болидиғанлиқиға даир һеч қандақ тәхмини йоқлуқини тилға елип, «биз (русийә пирезиденти виладимир) путинниң каллисидикини биләлмәймиз» деди.
җен псаки американиң һәр хил еһтималлиқларға қарита һошйарлиқта икәнликини тәкитләп: «бизниң таллиған йолимиз дипломатийәдур, лекин чегра районида һәрикәтлинишләрниң көпәйгәнликини көрмәктимиз» деди.
байдинниң һазир диққитини шималий атлантик әһди тәшкилатиниң шәрқий тәрипигә мәркәзләштүргәнликини тәкитлигән псаки: «ениқ болсун үчүн дәватимән. байдинниң украинаға әскәр әвәтиш нийити йоқ» деди
бу арилиқта, җо байдин русийә украинани ишғал қилған әһвалда, пирезидент виладимир путинға ембарго йүргүзәләйдиғанлиқини ейтти.
җо байдин пайтәхт вашингитондики бир кичик карханини зийарәт қилиш җәрйанида мухбирларниң соаллириға җаваб бәрди.
җо байдин бир мухбирниң, «әгәр путин украинани ишғал қилса, путинға ембарго йүргүзәмсиз?» дегән соалиға «һәә» дәп җаваб бәрди.
байдин шималий атлантик әһди тәшкилатиниң шәрқий қанитидики дөләтләрни қоғдаш үчүн 8500 америка әскириниң тәййар турғанлиқини вә бу әскәрләрниң бир қисминиң пат йеқинда йавропаға маңидиғанлиқини билдүрүп, «һеч бир шималий атлантик әһди тәшкилатиға әза дөләтниң қорқуши һаҗәтсиз. биз нато (шималий атлантик әһди тәшкилати) болуш сүпитииз билән уларни қоғдашқа келимиз» деди.
украинаға таҗавуз қилишниң русийәгә еғир иқтисадий ақивити болидиғанлиқини тәкитлигән байдин: «бизниң украинаға америка йаки шималий атлантик әһди тәшкилати әскәрлирини орунлаштуруш пиланимиз йоқ» деди.
байдин путинниму таҗавузчилиқниң бәдилиниң «бәк еғир» болидиғанлиқи һәққидә агаһландурғанлиқини әскәртип: «мән униңға әгәр украинаға чеграда топлиған әскәрлири билән киридиған болса, буниң иккинчи дунйа урушидин буйанқи әң чоң ишғалийәт болидиғанлиқини ейттим. бундақ вәзийәт пүткүл дунйани өзгәртиду» дегән сөзләрни ишләтти.
