омикрон варийантиға мунасивәтлик 18 милйондин артуқ вәқә көрүлгән
дунйа сәһийә тәшкилатиниң директори тедрос адханом ғебрейесус (Tedros Adhanom Ghebreyesus) йеқинқи бир һәптә ичидә дунйада омикрон варийантиға мунасивәтлик 18 милйондин артуқ вәқә көрүлгәнликини билдүрди.
түркийә авази радийоси хәвири: дунйа сәһийә тәшкилатиниң директори тедрос адханом ғебрейесус йеқинқи бир һәптидә дунйада вухән вируси (Kovid-19) омикрон варийантиға мунасивәтлик 18 милйондин артуқ вәқәниң көрүлгәнликини вә варийантниң наһайити тез тарқалғанлиқини ейтти.
у дунйа сәһийә тәшкилатиниң җәнвәдики мәркизидә өткүзүлгән ахбарат елан қилиш йиғинида, илгирики варийантларға селиштурулғанда өлүмниң аз болуши сәвәблик омикронни «йәңгил кесәллик» дәп қарашниң хата икәнликини әскәртти.
у: «омикронниңму дохтурианида йетишқа мәҗбур қилидиғанлиқини вә өлүмгә сәвәб болидиғанлиқини унтумаслиқимиз керәк. варийант нурғун киши хәтәр астида туруватқан бу мәзгилдә наһайити тез тарқалмақта. дунйада омикрон варийантиға мунасивәтлик 18 милйондин артуқ вәқә көрүлди. өлүм санлири һазирчә муқим, әмма сәһийә хизмәтчилири вә сәһийә системилирини қийинчилиқ тоғдуридиған омикронниң тәсирлири һәққидә әндишимиз еғир» деди.
у омикрон тарқиливатқан бу күнләрдә ваксина әмләтмигән кишиләргә ваксина йәткүзүшниң һәр қандақ вақиттикидин техиму муһим икәнликини әскәртип, бар болған ваксиналарниң омикронға нисбәтән үнүминиң төвән болуши мумкинликини, әмма кесәл болуш вә өлүм хәтиригә нисбәтән үнүминиң йуқири икәнликини қәйт қилди.
у: «омикрон дунйада тарқиливатқан вә йеңи варийантларниң оттуриға чиқиш еһтимали бар болған әһвалда, вабаниң ахириға йеқинлашқанлиқимизни ейтқили болмайду. ваксинаға еришиштики баравәрсизлик вухән вирусиға қарши күрәшкә сәлбий тәсир көрсәтмәктә. һазирқи әһвални өзгәртмисәк, ваксина баравәрсизликидә техиму начар дәвргә киримиз» деди.
