боррел: русийәниң мәқсити америка билән йавропани парчилаш

түркийә авази радийоси хәвири: йавропа парламентиниң ташқи сийасәтләр, хәвпсизлик вә мудапиә комитетлири украинаниң шәрқий вә русийә билән чеграда давамлишиватқан киризис тоғрисида йиғин өткүзди.

йиғинда, йавропа иттипақи ташқи мунасивәтләр вә хәвпсизлик сийасәтлири алий вәәкили җосеп боррел сөз қилип, русийәниң  украина чеграсиға 100 миң әтрапида әскәр орунлаштурушидин кейин оттуриға чиққан җиддийчилик вә русийәниң америка һәмдә натоға сунған йавропадики хәвпсизлик капаләтлири қатарлиқ мәсилиләр қарап чиқилған музакирәләр үстидә тохталди.

у бәзи көзәткүчиләрниң, русийәниң йавропа иттипақи билән үстәлгә олтурмаслиқини «йавропа иттипақиниң мувәппәқийәтсизлики» дәп қарайдиғанлиқини әскәртип: «музакирәләр давамлашса- өмүри узун болидиғандәк әмәс, үстәлдә бизгә тәсир көрситидиған тәклипләр болса чоқум қайси тәрәптә туридиғанлиқимизни көрситишимиз керәк» деди.

у: «русийәниң музакирәләрниң бир парчиси болушимизни халимаслиқидики сәвәб наһайити ениқ. ғәрб темини бөлүп, америка вә йавропа иттипақини парчилап, русийәниң мәнпәәтигә хизмәт қилиш» деди.

у йавропа иттипақиниң русийәгә нисбәтән җиддийчиликни пәсәйтишкә чақириш вә киризисниң алдини елиш һалитидә туруши керәкликини әскәртип, украинаға қарши һәр қандақ шәкилдики һуҗумларниң җавабсиз қалмайдиғанлиқини давамлиқ қаттиқ тәкитлиши лазимлиқини билдүрди.

у һазирғичә украина һөкүмитиниң бивастә йардәм тәләп қилмғанлиқини, бирақ тәләп қилған әһвалда уни әмәлгә ашуруш үчүн йавропа иттипақиниң пикир бирдәкликигә игә икәнликини қәйт қилди.

у 24-йанвар (2022) ечилидиған йавропа иттипақи ташқи ишлар министирлири йиғинида охшимиған тәклипләргә қарап чиқилидиғанлиқини билдүрди.

җәнвәдә 10-йанвар (2022) америка-русийә, 12-йанвар белгийә пайтәхти бирйусселда нато-русийә йиғини өткүзүлгән иди.

украина баш министири владимир зеленский өткән ай (2021-йили декабир) бирйусселда өткүзүлгән йавропа иттипақи-шәрқ шерикчилики йиғинидин кейин, йавропа иттипақиниң русийәниң еһтимали бар һуҗумини сақлап турмастин ембарго йүргүзүши керәкликини ейтқан иди.

боррелниң ишханиси 17-йанвар (2022) русийәгә қаритип тутуп турулуватқиниға бир йил болған алексий навалнийни қойуп беришни чақириқ қилған иди.