nigériye armiyesi boko haramgha qarshi herbiy heriket élip bardi
gherbiy afriqagha jaylashqan nigériyening sherqiy shimalida térrorluq teshkilati boko haramgha qarshi élip bérilghan herbiy herikette, nurghun térrorist bir terep qilindi.
türkiye awazi radiyosi xewiri: nigériye armiyesining bayanatchisi onyéma nwachukwu yazma bayanat élan qilip, boko haram térroristlirining borno ishtatigha qarashliq biyu rayonida herbiy qisimlargha hujum qilghanliqini bildürdi.
bayanatchi onyéma nwachukwu mezkur weqedin kéyin, armiye qisimlirining boko haramgha qarshi herbiy heriket bashlap, nurghun térroristlarni bir terep qilghanliqini eskertti.
u herbiy herikette térroristlarning lagérlirining bombardiman qilinghanliqini, nurghun qoral-yaragh, aptomobil we oq-dorilarning qolgha chüshürülgenlikini qeyt qildi.
térrorluq teshkilati boko haram yéqinqi yillarda élip bérilghan herbiy heriketlerge qarimay, afriqadiki nopusi eng köp nigériyede nahayiti chong xewpsizlik mesilisi bolup turmaqta.
nigériyede 2000-yillarning béshidin tartip mewjutluqini körsitiwatqan boko haram térrorluq teshkilatining, 2009-yildin buyan peyda qilghan keng kölemlik hujumlirida, 20 mingdin artuq kishi jénidin ayrildi.
boko haram térrorluq teshkilati 2015-yildin buyan nigériyening qoshnisi kaméron, nigér we chad qatarliq döletlerde bir qatar hujum weqelirini peyda qildi. chad köli oymanliqidiki hujumlarda, eng az dégende 2 ming kishi jénidin ayrildi.
nigériyede térrorluq hujumliri we toqunushlar sewebidin yüzminglarche kishi yurt-makanliridin ayrilishqa mejbur boldi.
مۇناسىۋەتلىك خەۋەرلەر
misir tashqi ishlar ministiri türkiyede ziyarette bolidu
misir tashqi ishlar ministiri samih shükri hepte axirida türkiyede dölet ishliri ziyaritide bolidu.
