amérika: rusiyege diplomatiye jehettinmu iqtisadiy émbargo yürgüzüshke teyyarmiz
amérika qoshma ishtatliri dölet xewpsizlik ishliri meslihetchisi jeyk salliwan rusiye – ukraina mesiliside ishghalchi rusiyege diplomatiye jehettinmu iqtisadiy émbargolarni yürgüzüshke teyyar ikenliklirini bildürdi.
türkiye awazi radiyosi xewiri: salliwan, aqsarayda ötküzgen kündilik muxbirlarni kütüwélish yighinida bergen bayanatida, rusiye – ukraina mesiliside jenwe, biryussél we wéyannada yighinlar chaqirilghanliqini, yighinlarda, hem amérika qoshma ishtatliri hem rusiye endishe qilidighan mesililer heqqide muzakire élip barliqliqlirini, ilgirilesh hasil qilghili bolidighan we ilgirilesh hasil qilghili bolmaydighan nuqtilarni ochuq – ashkara halda otturigha qoyghanliqlirini tekitlep mundaq dédi: «semimiy we biwasite élip bérilghan hem muweppeqiyetlik ötken muzakiriler bizge we rusiyege jiddiy oylinishqa tégishlik muhim pursetlerni sundi. muzakirilerdin kéyin ittipaqdashlirimiz bilen bu basquchning qandaq dawamlishishi mesiliside söhbet ötküzimiz. yawropa-atlantik okyanning bixeterliki we muqimliqini qoghdash üchün diplomatiyege teyyarmiz. shundaqla, eger rusiye bashqa yolni tallisa, biz jawab qayturushqimu teyyarmiz. biz shériklirimiz bilen rusiye ukrainagha tajawuz qilghan ehwal astida qollinilidighan qattiq iqtisadiy émbargolar mesiliside qoyuq hemkarliqimizni dawamlashturimiz.»
u, amérika qoshma ishtatlirining ukrainaning zémin pütünlüki we igilik hoquqini qoghdishi üchün kiyéwni qollashni dawamlashturidighanliqini tekitlep mundaq dédi: «herbiy mudaxililerning éghir bedeller we aqiwetlerni élip kélidighanliqini rusiyege ochuq – ashkara halda bildürduq. shuni alahide tekitlep ötimenki, rusiye bilen muzakirilerning dawami üchün yéngi éniq waqit békitilmidi, hem ittipaqdashlirimiz bilen hem rusiye bilen dawamliq alaqe ornitimiz.»
