blinkén ukraina tashqi ishlar ministiri bilen körüshti

türkiye awazi radiyosi xewiri: amérika tashqi ishlar ministiri antoni blinkén bilen ukraina tashqi ishlar ministiri dmitro kuléba amérika-rusiye istratégiyelik muqimliq diyalogining netijilirini we nato-rusiye kéngishi yighinidin ilgiri rusiyege qarshi bésilidighan qedemlerni muzakire qildi.

amérika tashqi ishlar ministirliqining bayanatchisi néd prays yazma bayanatida, blinkén bilen ukraina tashqi ishlar ministiri kulébaning téléfonda körüshkenlikini qeyt qildi.

u: «rusiyening ukraina we etrapida kéreksiz halda esker yighishigha qarita ortaq endishelirini tilgha alghan ministirlar, jenwe shehiridiki amérika-rusiye istratégiyelik muqimliq diyalogining yighinliri we ete (2022-yili 13-yanwar) bélgiye paytexti biryussélda échilidighan nato-rusiye kéngishi yighinidin burun, bésilidighan kéyinki qedemlerni muzakire qildi» dédi.

u ministir blinkénning 13-yanwar (2022) da awstiriye paytexti wiyénnada échilidighan yawropa xewpsizlik we hemkarliq teshkilati daimiy kéngishining yighini toghrisidiki ümidlirini tilgha alghanliqini eskertti.

u blinkénning ukraina bolmighan ehwalda ukraina toghrisida héchqandaq körüshüshning bolmaydighanliqini  éytqanliqini alahide tekitlidi.

u: «ministir blinkén, rusiye toqunushni ulghaytish yolini tallisa, amérika we ittipaqdashlirining, rusiye iqtisadigha zor bedel tölitishni, natoning aldinqi sépidiki ittipaqdash döletler mewjutluqini köpeytishke we ukrainagha qiliwatqan mudapie yardimini ashurushqa teyyar ikenliklirini tekrarlidi» dédi.

amérika tashqi ishlar ministirliqining meslihetchisi wiktoriya nuland axbarat élan qilish yighinida, rusiyeni ukrainagha tehdit sélish we yawropada muqimliqqa ziyan sélish bilen eyiblidi.

wiktoriya nuland moskwani ukrainagha qarshi herbiy küch ishlitishtin agahlandurup, rusiye jiddiychiliklerni peseytmigen ehwalda amérikaning yawropadiki ittipaqdashliri bilen rusiyeni éghir iqtisadiy bedel tölitishke teyyar ikenlikini qeyt qildi.