b d t afghanistan üchün insanperwerlik yardem herikiti bashlidi
b d t ning insanperwerlik ishlirigha mesul muawin katipi we jiddiy yardem kordinatori martin grifis (Martin Griffiths) insaniy kirizis yüz bergen afghanistan üchün 4.4 milyard dollar qimmitide insanperwerlik yardimi herikitini bashlighanliqlirini éytti
türkiye awazi radiyosi xewiri: b d t ning insanperwerlik ishlirigha mesul muawin katipi we jiddiy yardem kordinatori martin grifis, b d t musapirlar aliy komissari filippo grandi (Filippo Grandi) b d t ning shiwéytsariye paytexti jenwediki ishxanisida ötküzülgen axbarat élan qilish yighinida, afghanistan üchün bashlanghan yéngi yardem seperwerlik herikiti heqqide melumat berdi.
u taliban 15-awghust (2021) hakimiyetni qoligha alghandin buyan afghanistan xelqining yéngi heqiqetlerge duch kelgenlikini xatirilitip: «afghanistandiki insaniy weziyetke nisbeten xelqning éhtiyajlirini qamdash üchün téximu chong pilanlarni tüzüshimiz kérek» dédi.
u afghanistanning burunqidin téximu köp yardemge éhtiyajliq ikenlikini tekitlep: «bügün afghanistan üchün 4.4 milyard dollar qimmitide yardem seperwerlik herikitini bashlaymiz. bu yardem miqdari bir dölet üchün qilinghan insanperwerlik yardem heriketlirining eng chongi bolup, 2021-yili yighilghan puldin üch hesse köp» dédi.
u afghanistanda 2 milyondin artuq puqraning dölet ichide yurt-makanliridin ayrilghanliqini, 23 milyon kishining insanperwerlik yardemge éhtiyajliq ikenlikini we besh yashtin töwen 1 milyongha yéqin balining yéterlik ozuqlinalmasliq xetiri astida ikenlikini qeyt qildi.
u mundaq dédi:
«aililer yashawatqan jaylarda yémek-ichmek, déhqanlar tériqchiliq qilidighan jayda uruq we afghanistandiki doxturxanilarni dawalash üskünliri bilen teminleymiz. yurt-makanlirigha qaytishni telep qilghan kishilerning bixeterlikini kapaletke ige qilishimiz kérek.»
u: «pilan qilinghan 4.4 milyard dollarliq yardem herikiti, afghanistandiki barliq insaniy éhtiyajlarni qamdashqa yétidu. 2021-yildiki yardem herikitide nishan qilinghan yardem miqdarini yighaliduq. xelqaraliq jemiyetler bu mesilige intayin sezgür muamile qildi. bu yilmu oxshash pozitsiyening namayan qilinishini ümid qilimiz» dédi.
b d t musapirlar aliy komissari filippo grandi mezkur yardem seperwerlik herikitining meqsitining, afghanistanni ichki muqimliqqa érishtürüsh we téximu chong kölemlik köch kirizisining aldini élish ikenlikini bildürdi.
u afghanistanda siyasiy muqimliqning ashqanliqini eskertip: «15-awghusttin buyan dölettin ayrilghan afghanistanliqlarning 170 mingi qaytti. kishilerning qaytishi, taliban bilen burunqi hökümet otturisiki toqunushlar we dölettiki bixeterlik mesililirining axirlashqanliqi türtke boldi. bu ehwal yene bir qétim bixeterlik muhiti peyda qildi. biz buningdin yaxshi paydilinishimiz kérek» dédi.
u afghanistandin köchüshke seweb boluwatqan insaniy kirizisqa qarshi afghanistan musapirlirigha sahibxanliq qilghan rayon döletlirining kirizisni peseytishte muhim rol oynighanliqini bildürüp: «rayon döletlirining sirtida nurghun afghanistanliqlargha sahibxanliq qilghan türkiyege oxshash döletlerni untumasliqimiz kérek» dédi.
