nato: rusiyening endishilirige her daim qulaq sélishqa teyyarmiz
shimaliy atlantik ehdi teshkilati bash katipi stolténbérg rusiyening endishilirige her daim qulaq sélishqa teyyar ikenliklirini bildürdi.
türkiye awazi radiyosi xewiri: stolténbérg, shimaliy atlantik ehdi teshkilatining widéo konférans wasitisi arqiliq chaqirilghan tashqi ishlar ministirliri yighinidin kéyin ötküzülgen axbarat élan qilish yighinida bergen bayanatida, yighinda, ittipaqdash döletlerning, rusiyening ukraina chégrasida we ukrainaning ichki qisimlirida qoshun orunlashturushining yawropaning bixeterlikige qarita tesirliri heqqide muzakire élip barghanliqlirini eskertish bilen bir waqitta, rusiyening chaqriqlargha qarimay qoshun orunlashturush we tehdit sélishni dawamlashturuwatqanliqini tekitlep mundaq dédi: «toqunush xewpi tughuldi, rusiyening tajawuzchiliq pozitsiyesi yawropaning bixeterlik tertipige ziyan yetküzdi.»
2019 – yildin buyan tunji qétim 12 – yanwar küni shimaliy atlantik ehdi teshkilati – rusiye kéngishi yighini chaqirilidighanliqini qeyt qilghan stolténbérg, 10 – yanwar küni jenwede amérika qoshma ishtatliri – rusiye yighini, 13 – yanwar küni yawropa bixeterlik we hemkarliq teshkilati yighini chaqirilidighanliqini tekitlep mundaq dédi: «kéler hepte ishqa ashurulidighan uchrishishlar, rusiyening diyalog we diplomatiye mesiliside jiddiy qaraydighanliqini namayen qilishi üchün muhim bir pursettur, rusiyening endishilirige her daim qulaq sélishqa teyyarmiz. shimaliy atlantik ehdi teshkilati, kirizisning siyasiy yollar bilen hel qilinishi üchün her jehettin tirishchanliq körsitidu, lékin, diyalogning menilik bolushi üchün, buning ittipaqdashlarning rusiyening herbiy paaliyetliri heqqide uzundin buyan dawamlishiwatqan endishilirinimu öz ichige élishi kérek.»
u, shimaliy atlantik ehdi teshkilatining rusiye bilen yaxshi niyette söhbet ötküzidighanliqini eskertip mundaq dédi: «biz diplomatiyening meghlub bolush éhtimalliqigha qarita teyyarliq körüp qoyushimiz lazim, buningdin kéyin ukrainagha qaritilghan herqandaq shekildiki tajawuzchiliq rusiyege nisbeten éghir aqiwetler we éghir bedellerni élip kélidu.»
u yene, shimaliy atlantik ehdi teshkilatining ukrainani dawamliq qollaydighanliqinimu sözlirige ilawe qildi.
