chet el küchliri iraqtin chékindi
iraq amérika bashchiliqidiki xelqara ittipaqdash küchlirining térrorluq teshkilati daéshqa qarshi küresh qilish wezipisining axirlashqanliqini, barlq küchlerning dölettin pütünley chiqip ketkenlikini bildürdi.
türkiye awazi radiyosi xewiri: iraq bash ministiri mustafa elqazimi, ammiwi ortaqlishish tor béti Twitter sehipiside élan qilghan bayanatida, amérika qoshma ishtatliri bashchiliqidiki xelqara ittipaqdash küchlirining térrorluq teshkilati daéshqa qarshi küresh hem urush qilish wezipisining axirlashqanliqini, barlq küchlerning we urush eslihelirining dölettin pütünley chiqip ketkenlikini, xelqara ittipaqdash küchlirining buningdin kéyinki wezipisining, amérika qoshma ishtatliri bilen iraq otturisidiki istiratégiyelik diyaloglarning netijilirige asasen, peqet qollash we tewsiyelerde bolush bilenla cheklinidighanliqini eskertish bilen bir waqitta, térrorluq teshkilati daéshqa qarshi küresh ittipaqdash küchliri qomandanliq ishtabigha, ittipaqdash küchliridiki döletler, qoshna eller we ittipaqdash döletlerge minnetdarliq bildürdi, iraq küchlirining xelqini qoghdashqa teyyar ikenlikini tekitlidi.
térrorluq teshkilati daésh, 2014 – yili iyun éyida, iraqning musul, salahidin we enbar wilayetlirining pütkül qismini, diyale we kerkük wilayetlirining bir qismini qolgha kirgüzüwalghan, mezkur rayonlar kéyinki yillarda daéshtin qayturuwélinghanidi.
amérika qoshma ishtatliri bashchiliqidiki ittipaqdash küchliri, 2014 – yildin buyan iraq küchlirini eshya oboroti, axbarat we hawa hujumliri bilen qollap kéliwatqanidi.
baghdad we washington hökümetliri, iyul éyida iraqtiki xelqara ittipaqdash küchlirige qarashliq qisimlarning yil axirlirighiche dölettin chékinishi toghruluq birdeklik hasil qilghanidi.
ittipaqdash küchliri bilen iraq, 9 – dékabir küni, iraqtiki wezipisi axirlashqanliqi üchün, ittipaqdash küchlirining dölettin chékinip chiqip ketkenlikini uqturghanidi.
