garibashwili: türkiye – giruziye munasiwetliri téximu tereqqiy qildurulushi lazim

türkiye awazi radiyosi xewiri:  bash ministir garibashwili, giruziyening «‹Imedi› téléwiziyesi» ge bergen bayanatida, dölitining 2021 – yili yolgha qoyghan ichki – tashqi siyasetliri, yil boyi élip bérilghan iqtisadiy islahatlar we bashqa mesililer heqqide toxtaldi.

u, giruziye – türkiye munasiwetliri heqqide toxtalghanda, mundaq dédi: «türkiye bilen yéqin, dostane we qérindashlarche munasiwetlirimiz bar.»

iyun éyida paytext enqerede dölet ishliri ziyaritide bolghanliqini eskertken garibashwili, türkiye jumhuriyiti jumhur reisi rejep tayyip erdoghan teripidin eng yuqiri sewiyede qobul qilinghanliqini tekitlep mundaq dédi: «jumhur reis erdoghanning méni alahide we qizghin kütüwalghanliqidin intayin xursenmen, téléfon söhbetlirinimu öz ichige alghan köp sanda uchrishishlarni élip barduq, durus, nahayiti ochuq - yoruq we semimiy munasiwetlirimiz bar.»

türkiyening rayondiki nahayiti muhim dölet ikenlikini we giruziyening ikki terep munasiwetlirini téximu tereqqiy qildurush yolida dawamliq tirishchanliq körsitidighanliqini qeyt qilghan garibashwili, mundaq dep körsetti: «türkiye rayonda nahayiti muhim aktiyor bolup, istiratégiyelik hemrahliqtin intayin xursenmiz, bu munasiwetlirimizni izchil saqlap qélishimiz, tereqqiy qildurushimiz, téximu chongqurlashturimiz kérek, méning hemme jehettiki qarishim we pozitsiyem mana mushundaq bolup, türkiye jumhuriyiti jumhur reisi rejep tayyip erdoghanningmu  oxshash pozitsiyede bolushi méni cheksiz xushal qilidu.»

u, küchlük bir hemkarliq bolmay turup, rayonda soda – iqtisad, énérgiye layihelirini tereqqiy qildurushning mumkin bolmaywatqanliqini, shunga, ikki terep munasiwetlirini yenimu yüksek sewiyege yetküzüsh üchün ulughwar pilanlirining barliqini tekitlep mundaq dédi: «méningche bügün bu munasiwetni téximu kücheytish üchün intayin yaxshi purset bar.»