17-qétimliq astana söhbetliri bashlandi

türkiye awazi radiyosi xewiri:  süriye kirizisini hel qilishni meqset qilghan astana söhbetlirining kapaletchi döletliri bolghan türkiye, rusiye we iran heyetliri, qazaqistan paytexti nursultanda 17-qétim toplandi.

türkiyege wakaliten tashqi ishlar ministirliqining süriye ishlirigha mesul mudiri selchuk ünal bashchiliqidiki heyet, rusiyege wakaliten pirézidént putinning süriye alahide wekili aléksandir lawréntiyéw bashchiliqidiki heyet, irangha wakaliten tashqi ishlar ministirliqining siyasiy ishlar meslihetchisi eli asgar haji bashchiliqidiki heyet uchrishishlargha qatnashti.

süriye tereptin, muawin tashqi ishlar ministiri ayman susan bashchiliqidiki heyet, süriye qoralliq öktichilerge wakaliten ehmet tuma bashchiliqidiki heyet qatnashti.

b d t ning süriye ishlirigha mesul muawin wekili xawla mattar, iraq, iyordaniye we liwanning wekillirimu «közetküchilik» salahiyitide uchrishishlargha qatnashti.

türkiye heyiti uchrishishlar ramkisida, deslepte b d t ning süriye ishlirigha mesul muawin wekil xawla mattarning bashchiliqidiki heyet bilen körüshti.

ikki kün dawamlishidighan uchrishishlarda, süriyening nöwettiki weziyiti, insanperwerlik yardemlirining yetküzülüshi, jenwediki süriye asasiy qanun komitétining xizmitini qaytidin bashlash, mehbuslarni özara almashturush, esir élinghanlarni qoyup bérish we yoqap ketkenlerni izdesh qatarliq özara ishenchni kücheytidighan tedbirler asasliq küntertip maddiliri bolidu.

rusiye pirézidénti putinning süriye alahide wekili lawréntiyéw uchrishishlardin burun bayanat élan qilip, süriye weziyiti we urush toxtitishqa diqqetni merkezleshtüridighanliqlirini bildürdi.

u yéqinqi künlerde süriyede térrorluq teshkilati daésh we bashqa térrorluq teshkilatlirining uyqudiki hüjeyrilirining qaytidin akitiplishishqa bashlighanliqini eskertip: «shériklirimiz türkiye we iran bilen ötküzidighan uchrishishlirimizda mezkur mesililerge aldin ehmiyet bérimiz»dédi.

u yene, musapirlar mesilisi, yurt-makanliridin mejburiy ayrilish, insaniy kirizis qatarliq mesililerni hel qilish üchün, süriyede siyasiy musapini ilgirilitishning ehmiyitini eskertip: «süriye asasiy qanun komitétining xizmetlirimu eng muhim küntertip maddiliridin biri bolidu. bu mesilide süriye heyiti bilen ünümlük yighin achtuq» dédi.

süriye témiliq astana söhbetliri 2017-yili süriye kirizisini hel qilish meqsitide, türkiye, rusiye we iranning kapaliti astida bashlanghan idi.