америкада тунҗи қетим бир мусулман «диний әркинлик әлчилики»гә тәйинләнди

түркийә авази радийоси хәвири: америка пирезиденти җо байдин тәрипидин 30  -  ийул «американиң хәлқара диний әркинлик әлчиси» болушқа тәвсийә қилинған рәшад һүсәйинниң кандидатлиқи түнүгүн кеңәш палатаси омумий йиғинида авазға қойулуп, 5 кә қарши 85 кишиниң қоллиши билән мақуллуқтин өтти؛ шундақ қилип, рәшад һүсәйин бу вәзипигә тәйинләнгән тунҗи мусулман дегән намға еришти.

һүсәйин теги һиндистанлиқ бир мусулман аилиниң пәрзәнти болуп, американиң вайомиң иштатида дунйаға кәлгән؛ сийасий пәнләр, әрәбчә вә исламий илимләр бойичә тәһсил көргән вә йале университетидин пирофессорлуқ унваниға еришкән.

нөвәттә америка дөләт бихәтәрлик кеңишиниң һәмкарлиқ вә йәршари алақә директори болуп вәзипә өтәватқан һүсәйин, буниңдин илгири әдлийә министирлиқиниң дөләт бихәтәрлик бөлүмидә хизмәт қилғаниди.

у, американиң сабиқ пирезидентлиридин барак обама дәвридә американиң ислам һәмкарлиқ тәшкилати алаһидә вәкили вә террорлуққа қарши истратегийәлик күрәш алаһидә вәкили болуп вәзипә өтигәниди.