б д т: йеқиндин буйан афғанистандин чиқип кетишкә урунғучилар сани көпийиватиду
бирләшкән дөләтләр тәшкилати (б д т) мусапирлар ишлири алий комиссари филиппо гранди, йеқинқи бир нәччә һәптидин буйан афғанистандин чиқип кетишкә урунғучилар саниниң көпийип кәткәнликини илгири сүрди.
түркийә авази радийоси хәвири: гранди б д т хәвпсизлик кеңишигә доклат берип, афғанистан вәзийитиниң йеңи мусапирлар киризиси кәлтүрүп чиқириш еһтимали барлиқини ейтип агаһландурди.
у, афғанистандики 23 милйон кишиниң һәддидин зийадә ачарчилиқ шараитида йашаватқанлиқини, уларниң панаһлиниш, пакиз ичимлик сүйи вә сағламлиқ мулазимитигә еришиштә қийинчилиққа дуч келиватқанлиқини оттуриға қойуп, тоқунушлар сәвәбидин 3 милйон 500 миң кишиниң өй-маканлиридин айрилип қелишиниң мумкинликини қәйт қилди.
гранди инсанпәрвәрлик йардәмлиригә тайинип иқтисадни қутулдурғили болмайдиғанлиқини тәкитләп: «афғанистандики бу негизлик мәсилигә қарши илгириләшниң аста болуши интайин хәтәрлик» деди.
у йәнә: «йеқинқи бир нәччә һәптидин буйан дөләт тәвәликидин чиқип кетишкә урунған афғанистанлиқлар саниниң ешиватқанлиқини көрдуқ. биз дөләт вә иқтисадтики техиму чоңқур вә еғир вәйран болушниң қошна дөләтләргә, һәтта униңдинму йирақ җайларға қечишни техиму күчлүк дәриҗидә һәрикәтләндридиғанлиқиға ишинимиз» дегәнләрни сөзлиригә илавә қилди.
مۇناسىۋەتلىك خەۋەرلەر
исраилийә ливанға һава һуҗуми қозғиди
исраилийә армийәси ливанниң җәнубиға кәң көләмлик һава һуҗуми қозғиди.
