dunya sehiye teshkilati: cheklimiler omikron wariyantining tarqilishining aldini alalmaydu

türkiye awazi radiyosi xewiri: dunya sehiye teshkilati xelqara jemiyetke omikron wariyanti toghrisida bezi tewsiyelerni qildi.

dunya sehiye teshkilati sékritarliqining wariyantqa munasiwetlik yéngi özgirishlerni yéqindin közitiwatqanliqi, wariyant tunji bayqalghan jenubiy afriqa jumhuriyiti we botswananing xelqaraliq sehiye nizamnamesi boyiche omikron wariyantlirini tézlikte bayqap, waqtida doklat qilip, wariyantqa qarshi muweppeqiyetlik küresh qilish rohini namayan qilghanliqi qeyt qilindi.

bayanatta, omikron wariyantining kishini endishege salidighanliqi, yéngi wariyant sewebidin munasiwetlik döletlerge qarita sayahet cheklimisi yolgha qoyghan döletlerge, «sayahet cheklimiliri ijra qilghan döletler, bu tedbirlerni ispatlargha asasen yolgha qoyghan bolushi kérek» dep tewsiye qilindi.

bayanatta, bezi döletlerning wariyant tunji bayqalghan döletlerdin ayropilan sepirini pütünley toxtitish qarari toghrisida mundaq agahlandurush bérildi:

 «sayahet cheklimiliri wariyantning dunyagha tarqilishining aldini alalmaydu. kishilerning kündilik turmushi üchün zor qiyinchiliqlarni peyda qilidu. oxshash waqitta yene, wabagha qarshi dunyawi küreshke selbiy tesir körsitidu.»

bayanatta, waba dawamlishiwatqan jeryanda, insanperwerlik yardimi, téz yollanma, kündilik turmush mehsulatliri bilen teminlesh qatarliq hayatiy ehmiyetke ige xelqaraliq alaqilerning dawamlishishi kérekliki qeyt qilindi.

bayanatta, omikron wariyantining tarqilishining aldini élish üchün barliq döletlerge, «nazaret qilish we tertipke sélish sistémilirini tereqqiy qildurush», «wariyantlargha munasiwetlik weqe we hadisilerni dunya sehiye teshkilatigha waqtida bildürüsh» tewsiye qilindi.

dunya sehiye teshkilatining diréktori tédros adxanom ghébréyésus tünügün (2021-yili 30-noyabir) bayanat élan qilip, omikron wariyanti bayqalghan döletlerge qarita yolgha qoyulghan sayahet cheklmilirige naraziliq bildürüp, jenubiy afriqa we botswananing sayahet cheklimiliri bilen jazalandurulghanliqini ilgiri sürgen idi.