bélarusiye-polsha chégrasidiki musapirlar lagérlarni boshatti
bélarusiye-polsha chégrasida yawropa barmaqchi bolghan musapirlar chégra boyida qurghan lagérlarni pütünley boshitip, bélarusiye chégrasi ichige qurulghan lagérgha yötkeldi.
türkiye awazi radiyosi xewiri: bélarusiye grodno shehirdiki chégra boyida yawropagha barmaqchi bolghan musapirlar tünügün (2021-yili 18-noyabir) ormanliqlarda we chégra éghizlirida öz küchige tayinip qurghan lagérlardiki eshyalirini toplidi.
köpinchisi iraqtin bolup, süriye, afghanistan, iran we bashqa asiya hemde afriqa döletliridin kelgen musapirlardin ailisi barliri deslepte lagérlardin ayrildi. qalghan az sandiki musapirlarning kech terepte lagérlardin ayrilishi bilen, polsha chégrasigha yéqin bolghan jaylar pütünley quruqdaldi.
bélarusiye dölet chégra komitéti chégra nuqtiliridiki lagérlar pütünley boshitilghanliqi üchün, bu jaylarda muxbirlarning xizmet qilmaydighanliqini, ularning musapirlar orunlashqan merkezlerde xizmetlirini dawamlashturidighanliqini bildürdi.
bélarusiye pirézidénti lukashénkoning buyruqi boyiche bruzgi chégra éghizidiki merkezlege orunlashturulghan musapirlargha, tibbiy yardem, yémek-ichmek, su, dizinféksiye buyumliri, yotqan, körpe we ediyal qatarliq yardemler tarqitildi.
musapirlarning 10 kündin buyan soghuq hawada chédirlarda turghandin kéyin, merkezlerdiki üsti yépiq lagérlargha téz yötkilishi diqqet qozghidi.
bélarusiye pirézidéntliq mehkimisining bayanatchisi natalya éysmont (Natalya Eysmont) bélarusiye teweside 7 ming etrapida musapirning barliqini, polsha-bélarusiye chégrasidiki lagérlarda bolsa texminen 2 ming musapirning barliqini؛ 200 din 500 giche bolghan musapirning bélarusiyening yawropagha tutishidighan bashqa chégra nuqtilirida ikenlikini bildürdi.
