полша панаһланғучилар киризиси мәсилисидә русийәни әйиблиди
полша баш министири матеус моравички панаһланғучилар киризиси мәсилисидә, беларусийә пирезиденти александир лукашенкониң русийә пирезиденти владимир путинниң йолйоруқиға бойсунғанлиқини илгири сүрди.
түркийә авази радийоси хәвири: баш министирматеус моравички полша-беларусийә чеграсидики панаһланғучилар киризиси сәвәбидин полша парламенти чақирған пәвқуладдә йиғинида, русийәни чеградики панаһланғучилар киризисигә даир әйиблиди.
моравички дөлитиниң бихәтәрликиниң вә чеграсиниң 30 йилдин буйан тунҗи қетим бундақ еғир һуҗумға учриғанлиқини байан қилди.
моравички русийәниң империйализм сийасити йүргүзүватқанлиқини тәкитләп: «беларусийә пирезиденти александер лукашенко панаһланғучилар киризиси мәсилисидә, русийә пирезиденти владимир путинниң йолйоруқиға бойсунди» деди.
полша ички ишлар министири марийус камински беларусийә-полша чеграсида һазир 2 миңдин 4 миңғичә панаһланғучиниң барлиқини ейтти.
ички ишлар министири марийус камински полшаниң панаһланғучилар йоли болмайдиғанлиқини әскәртип: «русийә бир көчмәнләр киризисини қозғаш арқилиқ шәрқий вә оттура йавропани җүмлидин пүтүн йавропа иттипақини мәңгүлүк муқимсизлаштурушни ойлимақта. лукашенкониң сийасий мәқсити болса, йавропа иттипақини өзиниң күчини етирап қилишқа вә ембарголарни бикар қилишқа мәҗбурлаш арқилиқ өзини қобул қилдуруш болмақта» деди.
полша хәвәр агентлиқи (PAP) панаһланғучилар киризиси мунасивити билән, йавропа кеңишиниң рәиси чарлез мишелниң бүгүн (2021-йили 10-нойабир) полшада зийарәттә болидиғанлиқини вә баш министир моравички билән көрүшидиғанлиқини елан қилди.
