engliye firansiyeni agahlandurdi
engliye firansiyeni agahlandurup, tehdit sélishni dawamlashturghan ehwalda öch alidighanliqini bildürdi.
türkiye awazi radiyosi xewiri: firansiye tünügün (2021-yili 28-öktebir) béliqchiliq paraxotini musadire qilghan idi.
engliye muhit, yémek-ichmek we yéza igiliki ministiri jorj éyustis (George Eustice), engliye bilen firansiye otturisidki béliqchiliq mesilisi üstide toxtilip, firansiyening qilmishining <<pütünley muwazinetsiz we qobul qilghili bolmaydighanliqi>> ni bildürdi.
u: <<firansiyening teklipliri chégrada ishlarni téximu qiyinlashturidu. bu ular bilen tüzgen soda we hemkarliq kélishimlirimizgila emes, belki yawropa ittipaqi qanunlirighimu ochuqtin ochuq xilapliq qilghanliq bolup hésablinidu>> dédi.
u firansiyening küshkürtchilik xaraktérlik sözlerni qilghanliqini we tehdit sélishni axirlashturushi kéreklikini tekitlep: << néme qilidighanliqimizni bilmeymiz. firansiye engliyege qarshi yürgüzidighan tedbirlirini eng kéyin bolghanda, seyshenbe (2021-yili 2-noyabir) künigiche yürgüzmeydighanliqini bildürdi. qandaq qilidighanliqini körimiz. eger özi dégen tedbirlerni yolgha qoysa, bizmu oxshash usulni qollinimiz>> dédi.
firansiyening yawropa ittipaqi ishlirigha mesul dölet ministiri plémént bun (Clement Beaune) tünügün (2021-yili 28-öktebir) engliye bilen dawamlishiwatqan béliqchiliq mesilisi üstide toxtalghanda, engliye hökümitining peqet <<küch>> ni chüshinidighanliqini eskertip, engliye paraxotliridin bir qanchisidin bashqa firansiyediki portlarda toxtiyalmaydighanliqini éytqan idi.
engliye tashqi ishlar weziri liz trus (Liz Truss), firansiyening tehditlirini dawamlashturghanliqini seweb körsitip, londondiki firansiye bash elchisini chaqirtqan idi.
liz trus firansiye bash elchisi bilen körüshkende, firansiyening engliye we mansh aralliri toghrisida kishini ümidsizlendüridighan hemde muwazinetsiz bayanatlirigha chüshenche bérishni telep qilghan idi.
yawropa ittipaqi bilen engliye 2021-yilidiki béliqchiliq belgilimilirini békitish muzakireliride muresselisheligen bolsimu, emma firansiyelik béliqchilar belgilengen rayonlarda heriket qilmidi.
engliyege qarashliq jérséy (Jersey) arili hökümiti aral déngiz tewelikide dawamliq béliqchiliq qilmaqchi bolghan firansiye paraxotliridin ötmüshtiki heriketlirige munasiwetlik delil telep qilghan idi. bu ehwal engliye-firansiye munasiwitining yiriklishishige seweb bolghan idi.
