xelqara qizil kirést komitéti éfiyopiyege insanperwerlik yardem ewetishni chaqiriq qildi

xelqara qizil kirést komitéti (ICRC) isyanchi tigray xelq azadliq fironti bilen armiye otturisidiki toqunushlar köpeygen éfiyopiyede, puqralargha insanperwerlik yardem ewetishni chaqiriq qildi.

1726116
xelqara qizil kirést komitéti éfiyopiyege insanperwerlik yardem ewetishni chaqiriq qildi

türkiye awazi radiyosi xewiri: xelqara qizil kirést komitéti bashliqi pétér mawrér (Peter Maurer) üch künlük éfiyopiye ziyaritidin kéyin, komitétning shiwéytsariyening jenwediki merkizide axbarat élan qilish yighini ötküzüp, éfiyopiyening nöwettiki weziyiti üstide toxtaldi.

u yéqinqi heptilerde éfiyopiyening shimalidiki tigray we qoshna sheherlerde toqunushlarning köpiyiwatqanliqini eskertip: <<yüz bergen toqunushlar, kündilik éhtiyaj lazimetliklirini teminleshke tosqunluq qilip, sehiye sistémisini palech qilip qoyghan. puqralar hayatiy ehmiyetke éhtiyajlirini qamdashtin mehrum ehwalda>> dédi.

u toqunushlar kündilik turmushqa selbiy tesir körsetken rayonlarda nurghun ailining yémek-ichmek we tibbiy buyumlargha éhtiyaji barliqini tekitlep, weziyet mushundaq tereqqiy qilghanda, puqralarning uzungha sozulidighan sehiye mesililirige yoluqidighanliqi toghrisida agahlandurdi.

éfiyopiye armiyesining 2020-yili noyabirda isyanchi tigray xelq azadliq firontigha qarshi bashlighan herbiy herikiti dawamlashmaqta.

éfiyopiyening shimalida 11 aydin buyan dawamlishiwatqan toqunushlar, texminen 2.5 milyon kishining yurt-makanliridin ayrilishigha seweb bolghan bolup, rayonda 5 milyondin artuq kishi jiddiy insanperwerlik yardemge mohtaj ehwalda.



مۇناسىۋەتلىك خەۋەرلەر