нигерийәдә нурғун мәктәпләр дәрс тохтитишқа мәҗбур болған

түркийә авази радийоси хәвири: нигерийә пирезиденти муһәммәд бухариниң баш катипи ибраһим гамбари 4-қетимлиқ хәлқара бихәтәр мәктәпләр хитабнамә конаерансиға иштирак қилди.

баш катип гамбари конферанста пирезидент бухариниң намида қилған сөзидә, болупму нигерийәниң шималий районлиридики дөләт мәктәплиригә қарита барғансери көпийиватқан һуҗумларниң, маарип системисиға вәйран қилиш характерлик тәсир пәйда қилиши мумкинликини билдүрди.

у нигерийәдә елип қечиш қорқунчи сәвәбидин мәктәпкә бериштин қорқуватқан 12 милйондин артуқ балиниң барлиқини әскәртип: <<болупму қиз балилар үчүн бу бихәтәрлик мәсилилири вә тәсирлирини йиңишниң қийин икәнликини силәргә ейтмақчимән>> деди.

у нигерийә һөкүмитиниң маарип саһәсидә йетәрлик мувәппәқийәткә еришиш үчүн давамлиқ қолидин келидиған тиришчанлиқларни көрситидиғанлиқини қәйт қилди.

нигерийәниң маарипқа мәсул дөләт министири чуквумека нваҗийуба (Chukwuemeka Nwajiuba) дөләт мәктәплиригә қилиниватқан һуҗумларниң көпийиватқанлиқини билдүрди.

у елип қечилған оқуғучиларниң көпиниң фидйә бәдилигә қойуп берилгәнликини әскәртип, қутқузувелинған балиларниң роһи җәһәттин зәхмигә учриғанлиқини қәйт қилди.

йеқинқи айларда нигерийәниң бену, кадуна, катсина вә замфара иштатлиридики мәктәпләрдин оқуғучилар елип қечилған иди.

һуҗумлар сәвәбидин нурғун мәктәпләр дәрс тохтитишқа мәҗбур болған иди.