maduro diyalogning toxtap qélishigha amérikaning jawabkar ikenlikini bildürdi

türkiye awazi radiyosi xewiri: wénézuéla pirézidénti maduro w t w (VTV) téléwiziyeside bayanat élan qilip, öktichiler bilen 2021-yili 13-awghusttin buyan ötküzüp kelgen diyalogqa, amérikaning «ejellik pichaq» tiqqanliqini eskertip, körüshüshlerdin chékingenliklirini bildürdi.

u tünügün (2021-yili 17-öktebir) gherbiy afriqadiki yéshil tumshuq dairiliri teripidin amérikagha tapshurup bérilgen aléks saabning wénézuélaliq diplomat ikenlikini eskertti. u mundaq dédi:

«amérika méksika diyalog komitétining ezasi bolghan aléks saabni élip qachqanda, méksikadiki söhbetlerge ejellik zerbe béridighanliqini biletti. buni bilgenliki üchün, amérika heriketke ötti. diyalogni xalimaydu, wénézuéla üchün tinchliqni xalimaydu.»

u öktichiler bilen ötküzülidighan 4-qétimliq körüshüshni toxtitish buyruqini chüshürgenlikini eskertti we buninggha, saabning amérikagha tapshurup bérilishini seweb qilip körsetti.

bügün (2021-yili 18-öktebir) wénézuéla öktichilirining wekilliri élan qilghan bayanatta, hökümetning diyalog üstilige qaytip kélishi chaqiriq qilindi.

saab 2020-yili 12-iyun amérikaning telipi boyiche pul yuyush bilen eyiblinip, yéshil tumshuqta tutulghan idi.

wénézuéla dairilirining saabning tutulushi heqqide eyni waqitta élan qilghan bayanatlirida, saabning diplomat ikenliki alahide tekitlengen we yéshil tumshuqning wiyénna shertnamisige xilapliq qilghanliqi eyiblengen idi.

saab tünügün yéshil tumshuq teripidin amérikagha ötküzüp bérildi.