G20 dölet guruhining soda we sélinma ministirliri yighinining xitabnamesi élan qilindi
türkiyeni öz ichige alghan G20 dölet guruhining soda we sélinma ministirlirining nöwetchi reis dölet italiyening sorriénto shehiride ötküzülgen yighini, ortaq xitabnamening élan qilinishi bilen axirlashti.
türkiye awazi radiyosi xewiri: G20 dölet guruhining soda we sélinma ministirliri yighinining xitabnameside, G20 döletlirining dunya soda teshkilatida zörür islahatlarning élip bérilishi üchün teshkilatning barliq ezaliri bilen aktip we ijabiy shekilde tirishchanliq körsitishte qetiy iradige ige ikenliki bildürüldi.
xitabnamede, ministirlarning dunya soda teshkilatini asas qilghan halda ayrimichiliq qilinmaydighan, ochuq, adil, keng dairilik, hemme barawer, dawamlashturghili bolidighan we ochuq-ashkara, köp tereplik soda sistémisini kücheytish üchün bir yerge jem bolghanliqi qeyt qilindi.
ministirlarning bu heqte, muqim soda we meblegh sélish muhitini emelge ashurush mesiliside qaytidin wede bergenliki eskertildi.
xitabnamede G20 döletlirining wuxen wirusi (Kovid-19) din kéyin, chidamchan, küchlük, dawamlashturghili bolidighan we keng dairilik iqtisadiy eslige kélishke teng maslashqan halda küch chiqirishqa ilihamlandurup, wuxen wirusining xelqara soda we sélinmigha bolghan tesirini azaytishta oxshash pikirge ige ikenliki bildürüldi.
xitabnamede mundaq déyildi:
<< dunya soda teshkilatida zörür islahatlarning élip bérilishi üchün teshkilatning barliq ezaliri bilen aktip we ijabiy shekilde tirishchanliq körsitishte qetiy iradige igimiz.>>
xitabnamede yene, yuqumning dunya miqyasida bixeter we ünümlük wuxen wirusi waksinalirigha, dawalash we diyagnoz üskünilirige érishishning muhimliqini körsitip bergenliki tilgha élinish bilen birge, G20 dölet guruhining wuxen wirusigha qarshi dunya sodisini we sélinmisini qollash üchün heriket pilanlirining ijar qilinidighanliqi tekitlendi.
