taliban dunya döletlirini afghanistanning ichki ishlirigha arilashmasliqqa chaqirdi
afghanistandiki waqitliq taliban hökümitining «muweqqet tashqi ishlar ministiri» emirxan mutteqi dunya döletlirini afghanistanning ichki ishlirigha arilashmasliqqa chaqirdi.
türkiye awazi radiyosi xewiri: mutteqi qatardiki aspirantlar tetqiqat instituti qarmiqidiki toqunush tetqiqati we insanperwerlik heriket merkizi teripidin uyushturulghan yighinda söz qilip: «biz héchkimning ichki ishlirigha arilashmaymiz, bashqilarningmu shundaq qilishini ümid qilimiz. bashqa döletlerning afghanistangha tangidighan nersiliri héchqandaq payda élip kelmeydu» dédi.
mutteqi héchqandaq döletni arilashturmastin musteqil hökümet qurghanliqlirini we afghanistanning yéngi hökümetning sayisida tinchliq muhitigha érishkenlikini bildürüp, barliq döletler bilen tengpung, qoshna döletler bilen yaxshi munasiwet ornitishni xalaydighanliqlirini tekitlidi.
u, talibanning yawropa ittipaqi bilenmu yaxshi munasiwet ornitishni xalaydighanliqigha isharet qilip, afghanistanliq köchmenlerning yawropagha yük bolushini xalimaydighanliqlirini, buning héchkimge paydisi yoqluqini otturigha qoydi.
mutteqi afghanistanning ereb we pars qoltuqi döletliri bilenmu alahide munasiwet ornitishni xalaydighanliqini bildürüp: «afghanistan xelqi islam dunyasining muhim terkibiy qismi, yéngi dewrde ereb we islam döletliri bilen (arimizgha) köwrük sélishimiz kérek» dégenlerni qeyt qildi.
mutteqi, ötken yillarda afghanistandiki her qaysi tereplerning söhbetlirige sahibxanliq qilghan qatargha rehmet éytti we 9-10-öktebir künliri amérika terep bilen dohada ötküzülgen söhbetke «ijabiy» baha berdi.