borrél: afghanistanning ijtimaiy-iqtisadiy weziyiti yimirilish aldida

türkiye awazi radiyosi xewiri: yawropa ittipaqining tashqi munasiwet we bixeterlik siyasiti yuqiri derijilik wekili josép borrél, afghanistanning ijtimaiy-iqtisadiy weziyitining «yimirilish aldida» ikenlikini, buninggha jiddiy tedbir qollinish kéreklikini otturigha qoydi.

yawropa ittipaqigha eza döletlerning tereqqiyat ministirliri borrélning ishtirak qilishi bilen afghanistan toghrisida sin körünüshlük yighin chaqirdi.

borrél yighinda söz qilip: «afghanistandiki insaniy we ijtimaiy-iqtisadiy weziyet yimirilish aldida turmaqta. norwégiye musapirlar kéngishining doklatigha qarighanda, kem dégende 1 milyon bala muwapiq yardemge érishelmigen teqdirde, bu yil qishta soghuq we achliqtin ölüp kétish xewpige duch kélidiken. aqiwetning qandaq bolidighanliqini kütüp turalmaymiz. heriketke ötishimiz, hemde téz heriket qilishimiz kérek» dédi.

ministirlarning yawropa ittipaqining afghanistan xelqige qiliwatqan yardemning salmiqini ashurushning konkrét usullirini muzakire qilghanliqini bayan qilghan borrél sözini dawamlashturup: «bu, kéngesh maqullighan besh ölchemning emdi küchke ige emeslikidin dérek bermeydu. eksiche, ular yenila küchke ige we tertiplik tereqqiyat hemkarliqini dawamlashturush üchün toluq ijra qilinishi kérek» dégenlerni qeyt qildi.

yawropa ittipaqining yuqiri wekili borrél, buningdin ilgiri talibanning heriketlirige « bashqa döletlerge térror éksport qilmasliq, ayallar we kishilik hoquqqa, qanun bilen idare qilish we axbarat erkinlikige hörmet qilish, insanperwerlik yardemlirini yetküzüshke qolayliq yaritip bérish, chiqip kétishni xalaydighan chet elliklerning we xewp astidiki afghanlarning dölet tewelikidin chiqish kétishige ruxset qilish, afghanistandiki siyasiy küchler ara sighdurushchan we wekillik küchi yuqiri bir waqitliq hökümet qurush» qatarliq besh türlük ölchemge asasen baha béridighanliqlirini jakarlighanidi.