amérika emeldarliri bilen taliban wekilliri dohada körüshti

amérika emeldarlirining 9-10-öktebirde qatar paytexti dohada taliban wekilliri bilen körüshüp, afghanistanning nöwettiki weziyitini muzakire qilghanliqi élan qilindi.

1717633
amérika emeldarliri bilen taliban wekilliri dohada körüshti

türkiye awazi radiyosi xewiri: amérika tashqi ishlar ministirliqining bayanatchisi néd prays (Ned Price) yazma bayanat élan qilip, amérika emeldarliri bilen taliban wekillirining qatar paytexti dohada körüshkenlikini we körüshüshning semimiy shekilde ötküzülgenlikini bildürdi.

bu körüshüsh, taliban afghanistanda kontrolluqni qoligha alghandin kéyin, amérika emeldarliri bilen talibanning tunji qétim körüshüshi bolup hésablandi. körüshüshke, amérikaning oxshimighan idare-organlirining mesulliri qatnashti.

körüshüshlerde, afghanistandin kétishni telep qilghan amérikaliqlar we bashqa dölet puqralirining bixeter halda chégradin chiqip kétishige kapaletlik qilish, muhim mesililer qatarida muzakire qilindi. buningdin bashqa, dölette ayallarning yéterlik derijide hoquqqa ige bolushini öz ichige alghan kishilik hoquq we amérikaning afghanistan xelqige biwaste yardem qilish mesililirimu muzakire qilindi.

körüshüshlerde yene, amérika terepning talibanning wediliridin bekirek, emeliy herikitige qarap ish qilidighanliqi tekitlendi.

taliban waqitliq hökümitining «tashqi ishlar ministir wekili» emirxan mutteqi amérika bilen ötküzülgen uchrishishlarda, ikki terep munasiwetliride «yéngi sehipe échish» mesilisining muzakire qilinghanliqini bildürgen idi.

2021-yili 15-awghust taliban afghanistan paytexti kabulni qorshawgha alghan bolup, hakimiyetni tinch shekilde ötküzüwalghan idi. afghanistan pirézidénti eshref ghéni shu küni kechte qéchip ketken idi.

2021-yili 30-awghust amérika merkiziy armiye qomandanliq ishtabi (CENTCOM) ning qomandani kénnét mikkénizining (Kenneth McKenzie) amérika qisimlirining afghanistandin chékinsh musapisining axirlashqanliqini jakarlishi bilen, amérikaning afghanistandiki 20 yilliq herbiy mewjutluqi axirlashqan idi.  



مۇناسىۋەتلىك خەۋەرلەر