иран «самсуң» вә «LG» ширкәтлириниң аилә електир сайманлирини импорт қилишни чәклиди
иран пирезиденти ибраһим рәиси, дөләтниң рәһбири әли хамәнейниң йолйоруқиға асасән, җәнубий корейәниң «самсуң» вә «LG» ширкәтлириниң аилә електир сайманлирини импорт қилишни мәни қилди.
түркийә авази радийоси хәвири: иран рәһбири әли хамәней пирезидент ибраһим рәисигә мәктуп йоллап, импортниң «йәрлик ишләпчиқарғучиларни һалсиритип қойғанлиқи, буниң алдини елиш керәк»лики тоғрисида көрсәтмә бәрди.
пирезидент рәиси, мунасивәтлик министирлиқларға җәнубий корейәниң икки ширкитидин аилә електир сайманлирини импорт қилишни чәкләш тоғрисида һөҗҗәт чүшүрди.
иран пирезиденти 10 – сентәбирдики байанатида, америка қошма иштатлири җаза йүргүзүшни башлиған 2018 –йили иранға салған мәблиғини чекиндүргән, һәмдә иранға мәһсулат експорт қилишни тохтатқан җәнубий корейә ширкәтлириниң мәһсулатлириға әмди еһтийаҗлиқ әмәсликлирини, иранниң мәзкур дөләттин «контролсиз мәһсулат импорт» қилишқа йол қоймайдиғанлиқини тәкитлигәниди.
җәнубий корейәниң електирон мәһсулатлири ишләпчиқарғучилири — самсуң вә LG, узун йиллар бойичә иранниң аилә електир сайманлири вә йанфон базириға һөкүмран болғаниди.
