taliban mérkélni kabulgha teklip qildi

türkiye awazi radiyosi xewiri: gérmaniyening «bild» géziti, «taliban bayanatchisi zebihullah mujahid bash ministirni kabulgha teklip qildi» serlewhilik söhbet xatiriside, mujahidning «gérmaniyening afghanistan bilen tarixiy we yaxshi munasiwiti bar. gérmaniye bilen küchlük, shundaqla resmiy munasiwet ornitishni xalaymiz» dégen sözlirige orun berdi.

taliban bayanatchisi zebihullah mujahid, gérmaniye hökümitining yéngi hökümet (taliban hökümiti) bilen imkaniyetning yar bérishiche eng yaxshi diplomatik munasiwet ornitishini xalaydighanliqini tekitlidi.

u, gérmaniye bilen yaxshi diplomatik munasiwet ornitish bilen birlikte, bérlin hökümitidin sehiye, ul eslihe we maarip sahelirige iqtisadiy yardem bérishini we bu sahelerde hemkarliq ornitishini xalaydighaliqini eskertip: «gérmaniye hökümitining bizge heqiqeten yardem béreleydighanliqigha ishinimiz» dédi.

mujahid, bild géziti muxbirining «gérmaniye bash ministiri angéla mérkélni afghanistanda qizghin qarshi alamsiler?» dégen soaligha «uni dölitimizde heqiqeten qizghin qarshi alimiz» dep jawab berdi.

gérmaniye hökümiti herbiy tarqaqlashturush xizmetliri axirlashqandin kéyin, afghanistanda ishleydighan memuriy xadimlarni tarqaqlashturush mesilisi toghrisida taliban bilen söhbet ötküzüshni bashlighanidi.

gérmaniye hökümiti yene, bash kötürüsh éhtimali bolghan musapirlar kirizisining aldini élish üchün afghanistangha insanperwer yardem bérishni xalaydighanliqini uqturghanidi.

gérmaniye hökümiti taliban kabulni qolgha kirgüzgendin kéyin u yerdiki elchixanisini taqiwetken؛ hökümet alahide wekili bash elchi markus potzél qatarning paytexti dohagha bérip, taliban wekilliri bilen söhbet ötküzüshni dawamlashturghanidi.