blinkén: türkiye we qatar bilen birlikte heriket qiliwatimiz
amérika qoshma ishtatliri tashqi ishlar ministiri antoni blinkén, afghanistanning paytexti kabuldiki hamid karzai xelqara ayrodurumining derhal qaytidin échilishini ishqa ashurush üchün türkiye we qatar bilen birlikte heriket qiliwatqanliqlirini éytti.
türkiye awazi radiyosi xewiri: blinkén, tashqi ishlar ministirliqida afghanistan mesilisi toghruluq ötküzülgen axbarat élan qilish yighinida, amérika qoshma ishtatlirining afghanistan wakaletxanisining paaliyetlirini qatarning paytexti dohada dawamlashturuwatqanliqini, hepte axirida dohada ziyarette bolup, bu sheherge orunlashturulghan afghanlar bilen bir yerge jem bolidighanliqini qeyt qildi.
dohadin kéyin gérmaniyening paytexti bérlingha ötidighanliqini eskertken blinkén, bu yerde 20 – g guruhi döletlirining tashqi ishlar ministirliri bilen afghanistan mesilisi toghruluq yighin chaqiridighanliqini éytti, hemde afghanistanda qalghan amérika puqraliri mesiliside talibanlar bilen dawamliq alaqilishiwatqanliqlirini, talibanlarning afghanistandin chiqip kétishni telep qiliwatqanlargha ruxset bérishige qarita wediside turushining muhimliqini tekitlep mundaq dédi: «afghanistanning paytexti kabulning weziyitini eslige keltürüsh we kabuldiki hamid karzai xelqara ayrodurumining derhal qaytidin échilishini ishqa ashurush üchün, hemrahlirimizdin türkiye we qatar bilen birlikte heriket qiliwatimiz.»
