irandiki namayishlar altinchi künige qedem qoydi

türkiye awazi radiyosi xewiri: iranning erebler topliship olturaqlashqan xuzistan ölkiside su toxtap qilish ehwallirigha qarshi bashlanghan namayishlarning altinchi küni bender mehsher shehiride bir saqchi qaza qildi, ize shehiride bir namayishchi öltürüldi. xuzistanning bender mehsher shehiri muawin waliysi feridun banderi iran resmiy xewer agéntliqi — irnagha tünügün kechte yüz bergen weqeler heqqide melumat bérip: «namayishchilarning talegani baziridiki bir öyning ögzisidin oq chiqirishi netijiside bir saqchi qaza qildi, yene biri putidin yarilandi» dédi we weqening tekshürülüwatqanliqini bildürdi.

xuzistan ölkisining ahwaz, ize, mehsher, hurremshehr, abadan, susengerd we shadgan sheherliridiki namayishlarning altinchi künige qedem qoyghanliqi, namayishchilar bilen saqchilar otturisida toqunushlarning yüz bergenliki xewer qilindi.

ijtimaiy taratqulardiki süretlerge qarighanda, ize shehiridiki yüzligen namayishchi, dölet rehbiri xameniyge qarshi  «yoqalsun xameniy» dep shoarlarni towlighan.

mezkur sheherdiki namayishlar jeryanida muhemmed abdullahi isimlik bir namayishchining saqchilarning qoralliq arilishishi netijiside qaza qilghanliqi ilgiri sürüldi؛ shundaq qilip, namayishlar jeryanida qaza qilghan namayishchilar sani tötke yetken boldi.

bixeterlik qisimliri yash aqquzush bombisi we qoral ishlitip basturushqa urunghan namayishlar jeryanida, namayishchilar susengerd shehiride bir tankigha  ot qoyup berdi.

xuzistan ölkisining muhim su menbesi bolghan «hurulezim» kölchekliri bilen kerhe deryasining qurup kétishi we qarun deryasidin bashqa rayonlargha su yötkeshni nishan qilghan türning testiqlinishidin kéyin bash kötürgen ichimlik süyi kem bolush hadisisi sewebidin hamidiye, bostan, shadigan, shush, danyal we mehsher sheherliride 14 – iyul charshenbe kechqurun namayishlarning bashlinip ketkenliki, yüz bergen weqelerde kem dégende üch kishining qaza qilghanliqi bildürülgenidi.