dohada afghanistan söhbiti qayta bashlinidu

afghanistan milliy muresse aliy kéngishining bashliqi abdullah abdullah bashchiliqidiki yuqiri derijilik heyet taliban bilen muzakirelerni qaytidin bashlash üchün qatar paytexti dohagha qarap yolgha chiqti.

1676513
dohada afghanistan söhbiti qayta bashlinidu

türkiye awazi radiyosi xewiri: afghanistan milliy muresse aliy kéngishining bashliqi abdullah abdullah kabul ayrodurumida heyet namida bayanat élan qilip, dohagha baridighan heyetning toluq hoquqqa ige ikenlikini bildürdi.

u taliban bilen muzakirelerni qaytidin bashlash üchün muhim netijilerge érishishni ümid qilidighanliqlirini eskertip, dölette zorawanliqlar éship bériwatqan bu mezgilde muzakirelerni derhal bashlashqa éhtiyajliq ikenliklirini qeyt qildi.

sabiq pirézidént hamid karzayi, tinchliq ishlirigha mesul dölet ministiri sayed saadet nadiri, sabiq muawin pirézidént kerim xalili, jümbüsh partiyesining bashliqi batur dostum we belxning sabiq waliysi ata muhemmed nur qatarliqlar heyettin orun aldi.

amérika bilen taliban otturisida tinchliq kélishimi imzalanghandin kéyin, 2020-yili 12-séntebir qatar paytexti dohada muzakireler bashlanghan, emma közge körüngidek netije chiqmay turupla 2021-yili féwralda teqdirige tashlap qoyulghan idi.

afghanistanda tinchliq musapisi hazirmu éniqsiz halette turuwatqan bolup, xewpsizlik tarmaqliri bilen taliban otturisidiki shiddetlik toqunushlar dawamlashmaqta.

anadolu agéntliqining yerlik mesullardin igelligen melumatlargha asaslanghanda, taliban afghanistandiki 407 nahiyening 160 tin köpini, merkezlirini qoshup kontrol qilmaqta iken.



مۇناسىۋەتلىك خەۋەرلەر