amérika liwiyeliklerning saylam teyyarliqi yighinigha yuqiri baha berdi

türkiye awazi radiyosi xewiri: amérika qoshma ishtatliri, liwiye siyasiy diyalog munbirining 24-dékabirda liwiyede ötküzülüshi pilanliniwatqan saylamning asasiy qanunluq ramkisini muzakire qilish  üchün shiwéytsariyede yighin chaqirghanliqidin xushal bolghanliqini uqturdi.

amérika dölet bixeterlik ishliri meslihetchisi jeyk sulliwan yazma bayanat élan qilip: «biz liwiye siyasiy diyalog munbiri ezalirining 2021 – yili 24 – dékabirda liwiyede ötküzülidighan tarixiy saylamning teyyarliqliri toghrisida sözlishish meqsitide bu hepte jenwede yighin chaqirghanliqigha we bu munberning xizmetlirige yuqiri baha bérimiz» dédi.

bérlinda chaqirilghan ikkinchi nöwetlik liwiye yighinidimu otturigha qoyghinidek, amérikaning liwiyede pirézidéntliq we parlamént saylamlirining ötküzülüshi üchün  liwiye xelqi we xelqaraliq shériklirini qollaydighanliqini tekitligen sulliwan bayanatida yene: «bu saylam liwiyeliklerge öz rehberlirini saylash we uzun yilliq ichki toqunush hemde iqtisadiy dawalghushtin kéyin igilik hoquqini qaytidin tiklesh hoquqi bilen teminleydu» dégen ibarilerge orun  berdi.

u axirida, liwiye siyasiy diyalog munbiri yighinining ijabiy keypiyat we yarishish rohi ichide ötkenlikidinmu xushal bolghanliqini qeyt qilip: «biz liwiye xelqining téximu muqim, güllengen we bixeter kelgüsi berpa qilish xizmetlirini qollaymiz» dégenlerni sözlirige ilawe qildi.