b d t: hamas - israiliye urush toxtitish kélishimi intayin nazuk

türkiye awazi radiyosi xewiri: birleshken döletler teshkilati (b d t) ottura sherq tinchliq musapisi alahide wekili tor wénkésland, israiliye bilen pelestinlik guruppilar otturisida ötken ay hasil qilinghan urush toxtitish kélishimining «intayin nazuk ikenliki»ni éytip agahlandurdi.

tor wénkésland nyuyorkta b d t xewpsizlik kéngishi ezalirigha doklat bérip: «israiliye bilen hamas otturisidiki düshmenlikke xatime bérish nöwette intayin nazuk bir nuqtigha tayinidu, shunga terepler qutratquluqtin saqlinip jiddiychilikni peskoygha chüshürüshi kérek. ghezzede yene bir weyran qilghuch sürkilishtin saqlinish üchün barliq terepler mesuliyitini ada qilishi lazim» dédi.

b d t wekili israiliyeni «xelqara qanunda körsitilgen mesuliyetlirige mas halda pelestin xelqining bixeterlikini kapaletke ige qilish»qa chaqirdi we qaysi terepning bolushidin qetiynezer, zorawanliqning piltisige ot tutashturghuchilarning jawabkarliqqa tartilishining shert ikenlikini otturigha qoydi.

tor wénkésland, israiliyeni «pelestinliklerning öy – makanliri we mal – mülüklirige ziyan yetküzüshni toxtitishqa, shundaqla ularning qanunluq halette öy – makanlirini qurup chiqishlirigha ruxset qilish» qa chaqirdi.

u sözi jeryanida yene, pelestinlik öktichi nizar banatning pelestin xewpsizlik küchliri teripidin tutqun qilinip uzun ötmeyla wapat bolushidin «küchlük endishe» qilghanliqini bildürüp, bu mesilining ochuq – ashkara halette tekshürülüp, jawabkarlarning pash qilinishini telep qildi.

israiliyening muhasirisi astidiki ghezzege 10 – mayda bashlighan hujumliri, pelestin islamiy qarshiliq körsitish herikiti – hamas bilen hasil qilinghan urush toxtitish kélishimige asasen, 21 – may shu jay waqti saet 02:00 de axirlashqanidi.

israiliyening ghezzege qaratqan hujumlirida 66 si kichik bala, 39 i ayal bolup, jemiy 254 pelestinlik hayatidin ayrilghan, 1948 adem yarilanghan, minglarche bina yer bilen yeksan qilinghan yaki ishletkili bolmaydighan haletke chüshüp qalghanidi.