amérika teywenge waksina iane qildi

türkiye awazi radiyosi xewiri: amérikaning mémfis (Memphis) shehiridin waksina élip uchqan teywen hawa yolliri shirkitining yük ayropilani tünügün (2021-yili 20-iyun) teywen ayrodurumigha qondi.

modérna shirkiti tetqiq qilip yasighan 2.5 milyon wuxen wirusi waksinasi, teywen hökümiti wekillirige tapshuruldi.

teywen modérnagha texminen 5 milyon dane waksina zakas qilghan bolup, buningdin peqet 390 ming dane alalighan idi. amérika hökümiti mushu ay (2021-yili iyun) ichide teywenge 750 ming dane waksina ewetishni wede qilghan idi.

amérikaning wede bergen waksina sanning üch hessige toghra kélidighan waksinani iane qilishi, xelq saqliqi nuqtisidin éytqanda muhim bolghinidek, baydin hökümitining tinch okyan rayonida xitay bilen qurushqa tirishiwatqan yéngi géopolitikiliq tengpungluqlar nuqtisidinmu intayin muhim ikenliki körülmekte.

amérikaning teywen bilen resmiy diplomatik munasiwiti yoq, emma «teywen bilen bolghan munasiwetler qanuni» boyiche, soda, medeniyet we herbiy sahelerde hemkarliq ornitalaydu.

teywen, xitayning dölet shirkiti fosun dora shirkitining patént kélishimi bolushi sewebidin biyonték shirkiti tetqiq qilip yasighan waksinani sétiwiélishigha tosqunluq qilghanliqini ilgiri sürmekte. xitay bolsa, buni ret qilip, teywenni waksina bilen teminleshke teyyar ikenlikini bildürgen idi.

teywen xitaydin waksina import qilishni chekligenliki üchün, xitay waksinaliri teywenge keltürülmidi.

teywen mushu ayning béshida yaponiye iane qilghan 1.24 milyon dane astrazénéka waksinasini tapshuruwalghan idi.

wuxen wirusigha qarshi muweppeqiyet qazanghan döletler arisida körsitiliwatqan teywende, may éyining otturilirida wirusqa munasiwetlik weqelerning köpiyishi chong endishelerge seweb bolghan idi.