yawropa ittipaqi waksina belgilimilirini qanunlashturdi

türkiye awazi radiyosi xewiri: yawropa parlaméntida yawropa ittipaqi dijital wuxen wirusi waksinasi guahnamisining qanunlishishi munasiwiti bilen ötküzülgen imza murasimigha, yawropa ittipaqi komitétining bashliqi ursula fondérléyén, yawropa parlaméntining bashliqi dawid sassoli (David Sassoli) we yawropa ittipaqining nöwetchi reis döliti portugaliyening bash ministiri antoniyo kosta (Antonio Costa) qatnashti.

yawropa ittipaqi komitétining bashliqi ursula fondérléyén murasimdin kéyin ötküzülgen axbarat élan qilish yighinida, wuxen wirusi waksinasi guahnamisi belgilimirini qanunlashturush ishlirining axirlashqanliqidin memnun bolghanliqini bildürdi.

waksina guahnamisi heqsiz bolup, qeghez yaki dijital shekilde teyyarlinidu. ayrimichiliqning aldini élish meqsitide, waksina emletmigen kishilermu guahname alalaydu.

waksina guahnamisi kishilerning wuxen wirusi waksinasi emletken-emletmigenlikini, emletken bolsa qeyerde we qaysi waksinani emletkenlikini bildüridighan melumatlarni, wuxen wirusi bilen yuqumlanghanlarning salametlikining yaxshilanghanliqini, antitéla sewiyesige munasiwetlik uchurlarni we wuxen wirusi tekshürüsh netijisini öz ichige alidu.

guahname bilen, yawropa ittipaqida testiqlanghan wuxen wirusi waksinasi emletken we ikkinchi qétimliq waksina emlinip aridin ikki hepte ötken kishiler, sayahet jeryanida qoshumche salametlik tekshürüshidin ötmeydu yaki karantin qilinmaydu. xelq salametlikini qoghdashqa munasiwetlik zörür ehwallarda, döletler öz aldigha qoshumche tedbirlerni yolgha qoyalaydu.

waksina guahnamisi barliq yawropa ittipaqi döletliri we islandiye, lichténshtéyn, norwégiye, shiwéytsariye qatarliq döletlerdimu küchke ige bolidu.

waksina guahnamisi yawropa ittipaqi puqralirigha, qaysi dölet puqrasi bolushtin qetiynezer aililirige, yawropa ittipaqida yashawatqan, emma yawropa ittipaqi puqrasi bolmighan kishiler bilen bashqa yawropa ittipaqi döletliride sayahet qilish hoquqigha ige kishilerge bérilidu.

yawropa ittipaqi hazirche biyonték-fayzér, modérna, astrazénéka, jonson we jonson shirketlirining waksinalirini testiqlidi.